Xalqaro sanksiyalar ostida qolib ketgan va Rossiya prezidenti Vladimir Putin bosimiga uchragan rossiyalik milliarderlar Yevropadan o‘nlab milliard dollarlik aktivlarini olib chiqib ketishdi.
Kreml Rossiyaning eng boy fuqarolariga o‘z aktivlarini “do‘stona emas” deb atalgan mamlakatlardan vataniga qaytarish uchun bosim o‘tkazmoqda, deb yozadi Bloomberg.
Ikki tomonlama soliq to‘lashni chetlab o‘tish bo‘yicha shartnoma to‘xtatildi, shu munosabat bilan Rossiya kompaniyalar uchun dividendlar to‘lash yoki Yevropa kabi yurisdiksiyalarda ro‘yxatdan o‘tgan subyektlarga aktivlarini sotishni qiyinlashtirmoqda.
2023-yil avgust oyida magnatlar Igor Shilov va Mark Kurser tomonidan nazorat qilinadigan United Medical Group CY Plc va MD Medical Group Investments Plc aksiyadorlari kompaniyalarni Kiprdan Rossiyaga ko‘chirishni ma’qulladilar.
Bloomberg ma’lumotlariga ko‘ra, bu jarayon 2022-yil fevralidan beri Rossiyaning eng badavlat kishilari tomonidan olib chiqib ketilgan aktivlarning umumiy qiymatini kamida 50 milliard dollarga oshirishi mumkin.
Materialda aytilishicha, endi eng boy rossiyaliklar o‘z aktivlarini joylashtirish uchun kamroq joylarga ega, chunki ularning ko‘pchiligi AQSH, Buyuk Britaniya yoki Yevropa tomonidan sanksiyalar ostida.
Kipr, Jersi va Shveysariya kabi joylarda ro‘yxatdan o‘tgan aktivlarning Rossiyaga, shuningdek, Birlashgan Arab Amirliklari va Qozog‘iston kabi Kreml tomonidan do‘stona hisoblangan mamlakatlarga o‘tkazilishi urushdan ko‘p o‘tmay boshlandi. Birinchi ko‘chishlar orasida milliarder Andrey Guryev va po‘lat magnati Viktor Rashnikovning Shveysariya va Kiprdan Rossiyaga ko‘chirilgan oilaviy aktivlari bor edi. Boshqalar, masalan, milliarder Igor Altushkin, keyinchalik ularga ergashdi.
Bloomberg xabar qilishicha, nafaqat milliarderlar, balki boshqa rossiyaliklar ham o‘z aktivlarini vatanlariga o‘tkazishmoqda. Bu yil Rossiyaning ofshor zonalariga 115 ta kompaniya ko‘chib o‘tdi va ularning soni 254 tani tashkil etdi.
Izoh (0)