Fransiya Ichki ishlar vazirligi rahbari Jerald Darmanin respublika hukumati vazirlari va amaldorlariga murojaat qilib, politsiyaga katta yuk bo‘lmaslik uchun mamlakat bo‘ylab safarlar sonini imkon qadar kamaytirishni so‘radi.
Politsiya odatda Vazirlar Mahkamasi a’zolarining xavfsizligini ta’minlash uchun ularga safarlarda hamrohlik qiladi.
“Gap jamoat tartibi nuqtayi nazaridan istisno qilish mumkin bo‘lgan holatlar haqida ketmoqda”, — deya ta’kidladi Jerald Darmanin Vazirlar kengashi yig‘ilishida.
Ma’lum qilinishicha, vazir 18-sentabrdan 24-sentabrgacha bo‘lgan haftani nazarda tutgan. 20—22-sentabr kunlari Buyuk Britaniya qiroli Charlz III Fransiyaga tashrif buyuradi. Bundan tashqari, mamlakatda regbi bo‘yicha Jahon kubogi (8-sentabr—28-oktabr) o‘tkazilishi davom etmoqda, bu ham ko‘p sonli politsiya xodimlarini jalb qilishni talab qiladi.
Izoh (0)