Qashqadaryo viloyatining Yakkabog‘ tumani hokimi Lutfiddin Abdullayevning 2021-yil xizmat avtomobilini yangilash, Captiva xarid qilishga bo‘lgan urinishi jamoatchilik qiziqishini uyg‘otib, aksariyat kishilar mashina xarid qilishga sarflanayotgan 311 million so‘m pulni maqsadsiz sarflanayotgan mablag‘ degandi. Hatto tuman Kengashi deputatlaridan biri ham hokim uchun xizmat avtomobili sotib olishdan ko‘ra, shu mashinaga sarflanadigan pulni kam ta’minlanganlarga berish taklifini bildirgandi.
“Daryo” muxbiri viloyatda faoliyat yurituvchi hokimlarning xizmat avtomobillari rusumi bilan qiziqib, hududdagi mavjud shahar va tuman hokimlari qaysi rusumdagi xizmat avtomobillaridan foydalanishiga aniqlik kiritdi.
Viloyat hokimligi axborot xizmati rahbari Ahror Sodiqovning ma’lumot berishicha, viloyat hokimi Murodjon Azimov sobiq hokimlar — Zafar Ro‘ziyev hamda Zoir Mirzayevlar foydalanib kelgan, davlat raqami 70 010 DAV bo‘lgan Toyota Land Cruiser’da yuradi. Qarshi shahri hokimi Normo‘min Xolboyev ham sobiq hokim Jamshid Fozilov davrida xarid qilingan 70 019 DAV Malibu-2 xizmat avtomobilini minadi.
Viloyat biqinida joylashgan Qarshi tumani hokimi Behzod Yusupov ham viloyatning yagona ayol hokimi sifatida faoliyat yuritib kelgan Maqsuda Mustafoyeva foydalangan, davlat raqami 70 014 DAV bo‘lgan Captiva-2 avtomobilida yuradi.
Viloyatda, shuningdek, Mirishkor tumani hokimi Sherali Sanayev, Koson tumani hokimi Asrol Boyqarayev, Yakkabog‘ tumani hokimi Lutfiddin Abdullayev, Kasbi tumani hokimi To‘xtamurod Meyliyev, Chiroqchi tumani hokimi Xurram Jo‘rayev, Nishon tumani hokimi Muxtor Hayitmurodovlar ham Captiva rusumli xizmat avtomobillarini ma’qul ko‘rgan.
Shahrisabz shahri hokimi Akrom Sulaymonov, Shahrisabz tumani hokimi Samad Hasanov, Kitob tumani hokimi Alisher Zokirov, G‘uzor tumani hokimi Bekzod Suyunov, Qamashi tumani hokimi Botir Tog‘ayevlar esa Gentra avtomobillaridan foydalanadi.
Dehqonobod tumani hokimi Zoir Aliqulov davlat raqami 70 024 DAV bo‘lgan Tracker’dan, Muborak tumani hokimi Akrom Aripov esa 70 013 DAV raqam belgili KIA Seltos’dan foydalanadi.
“Daryo” muxbiri hokimlarning xizmat avtomobillari rusumini aniqlashtirishdan tashqari, jamoatchilik, xususan, viloyatdagi jurnalist va blogerlarga yuzlanib, hokimlar uchun bahaybat xizmat avtomobillar qanchalik zarur degan savolga ham javob oldi.
“Hokimlar uchun qanaqa mashina bo‘lishidan qat’i nazar yagona to‘xtamga kelish kerak. Bu borada yagona standartlar yaratilsa, turli munozaralarga o‘rin qolmasdi. Ya’ni barcha hokimlar bir xil rusumdagi xizmat avtomobilida yursin. Masalan, Matiz’mi — barchasi Matiz minsin, Nivami — Niva. Lekin eng asosiysi, qanaqa xizmat avtomobilida yursa ham haftada hech bo‘lmasa, bir marta jamoat transportiga chiqsin. Xalq foydalanayotgan transportga chiqib, xalqqa yanayam yaqinroq bo‘lsin”, — deydi jurnalist Nuriddin Egamov.
Viloyatda faoliyat yurituvchi bloger Husan Komiljonov esa hokimlarga xizmat avtomobili ajratilishida hududning geografik joylashuvi hisobga olinishi kerak demoqda.
“Hokimlarga xizmat avtomobili tanlashda shahar va tumanning geografik joylashuvini (tog‘li hudud, cho‘l hudud, shahar) hisobga olgan holda mashina ajratilishi kerak. Va hokim kamida haftada ikki kun jamoat transportida ishga borib kelishi shart. Mana shunda jamoat transporti, xalqqa yaqinlik, infratuzilmalarni yaxshilash borasida amaliy harakatlar paydo bo‘ladi”, — deydi bloger Husan Komiljonov.
“Qashqadaryo” gazetasi bosh muharriri Kamoliddin Karimov esa “Insonning kiyib yurgan kiyimiga qarab baho berish, degan bemaza mantiq miyadan o‘chirib tashlanmas ekan, jamiyatda hashamat, soxta obro‘ ustun bo‘lib qolaveradi”, — deydi.
Yana bir jurnalist “Huquq” gazetasining viloyatdagi muxbiri Norbo‘ta G‘oziyev esa hokimlar piyoda yurishining tarafdori ekanini aytmoqda.
“Yaqinda ijtimoiy tarmoqda bir mamlakat prezidentini ko‘rdim. Ayol kishi ekan. Ishga soyabon ko‘tarib, piyoda kelyapti. Prezidentning oldida hokimlar kim bo‘libdi? Ilgari Samarqand viloyati ‘Obkomi’ning Qodirov degan birinchi sekretari bo‘lardi. Avtobus va trolleybuslarda yurib, haqiqiy ahvolni kuzatardi”, — deydi Norbo‘ta G‘oziyev.
Bloger Otabek Ortiqov esa “Hokimlar Niva minishsin, tog‘li hududga ham, shaharga ham mos. Qolaversa, inomarka mashina”, — deydi.
“Daryo” respublikada faoliyat yurituvchi hokimlarning xizmat avtomobillari rusumini o‘rganishda davom etadi.
Izoh (0)