Yaponiyaning Fukusima va Miyagi prefekturalaridan 150 ga yaqin aholi “Fukusima 1” atom elektr stansiyasidan tozalangan radioaktiv suvning okeanga to‘kilishini to‘xtatish uchun sudga da’vo arizasi bilan murojaat qildi, deb yozmoqda Kyodo agentligi.
Da’vo arizasi mamlakatning markaziy hukumati va elektr stansiyalari operatorlari Tokyo Electric Power Company Holdings Inc. ustidan berilgan. Da’vogarlarning ta’kidlashicha, 24-avgustda boshlangan suv to‘kish amaliyoti fuqarolarning hayot xavfsizligiga tahdid soladi va mahalliy baliqchilarning biznesiga to‘sqinlik qiladi.
Ular, shuningdek, radioaktivli suvni oqizishga berilgan ruxsatnomani bekor qilishni va suvni okeanga to‘kishni taqiqlashni talab qilmoqda.
Qayd etilishicha, bu AES suvi masalasida Yaponiya aholisi tomonidan qo‘zg‘atilgan birinchi da’vodir.
AES suvini okeanga to‘kish boshlanganidan keyin Xitoy Yaponiyadan dengiz mahsulotlari sotib olishni taqiqladi. Yaponiya hukumati esa mahalliy baliqchilik sanoatini qo‘llab-quvvatlash uchun 20,7 milliard iyen (141 million dollar) miqdorida yangi yordam paketini e’lon qildi.
Xitoy Fukusima AESdagi suvni okeanga to‘kishga qarshi
2011-yildagi zilzila va sunami oqibatida yuzaga kelgan avariyadan so‘ng Fukusima AES hududida shikastlangan reaktorlarni sovitishda foydalaniladigan 1 000 dan ortiq suv rezervuarlari to‘planib qolgan, bu taxminan 1,3 million kub metr suvni tashkil etadi. Yaponiya rasmiylariga ko‘ra, 2024-yil boshida barcha rezervuarlar to‘lib bo‘ladi.
Ularda saqlanadigan suv yaxshilab tozalangan, ammo unda hali ham vodorodning radioaktiv izotopi — tritiy bor, bu modda izsiz yo‘qolib ketmaydi. Yaponiya hukumati bu suvni dengizga to‘kish zarurligini aytib, bu dunyoning boshqa atom elektr stansiyalarida ham odatiy hol ekanini ta’kidlamoqda.
Xitoy AESdagi suvni okeanga to‘kishga qat’iyan qarshi. Xitoy elchisi bu dasturni noto‘g‘ri deb atadi hamda Yaponiya dasturni to‘xtatib, birinchi navbatda qo‘shni davlatlar bilan maslahatlashuvlar o‘tkazishi kerakligini aytdi. 4-iyul kuni Atom energiyasi bo‘yicha xalqaro agentlik (MAGATE) rahbari Rafael Grossi Yaponiyaga tashrif buyurdi va suvni okeanga to‘kish qarorini ma’qulladi. Uning ta’kidlashicha, oqindi suv sifatiga, baliqlarga va yaqin atrofdagi manzilgohlarga katta ta’sir qilmaydi.
24-avgust kuni Yaponiyaning Tokyo Electric Power (TEPCO) kompaniyasi Fukusima-1 atom elektr stansiyasidagi tozalangan radioaktiv suvni okeanga to‘kishni boshladi.
Izoh (0)