“O‘zbek milliy maqom sanʼatini yanada rivojlantirish va soha vakillari faoliyatini qo‘llab-quvvatlash choralari to‘g‘risida”gi prezident qarori qabul qilindi, deb xabar beradi “Norma”.
Hujjatga muvofiq, 2023-yil 1-oktabrdan boshlab O‘zbek milliy maqom sanʼati markazi va uning hududiy bo‘limlari boshqaruv, ilmiy va ijodiy xodimlarining yangilangan oylik ish haqi miqdorlari joriy etiladi.
Markazning alohida shaxsiy g‘azna hisobvarag‘i hisobidan ustamalarni belgilash tartibi joriy etilmoqda. Bunda ustamalar markaz xodimlari faoliyatining quyidagi yo‘nalishlarida erishilgan natijalari asosida belgilanadi:
- respublika hududlarida va xorijiy davlatlarda gastrol konsert-tomosha tadbirlarida qatnashish;
- mumtoz musiqa yo‘nalishida maqom namunalariga xos asarlarni yaratish va ularni notaga olish;
- maqom va bastakorlar tomonidan bastalangan asarlarni takomillashtirish;
- OAV hamda ijtimoiy tarmoqlar orqali sof va mukammal ijrodagi maqomlarni targ‘ib etish;
- mumtoz musiqa merosiga oid ilmiy maqolalar chop etish, izlanishlar olib borish, kitoblar va to‘plamlar yaratish;
- maqom va bastakorlar tomonidan bastalangan asarlarning zamonaviy ohangdagi karaokelarini yaratish;
- “ustoz-shogird” anʼanalarini davom ettirish, maqom sanʼatini rivojlantirishga qaratilgan boshqa yo‘nalishlar.
Hujjat bilan 2023—2025-yillarda quyidagilarni tashkil etish rejalari tasdiqlandi:
- O‘zbek milliy maqom sanʼati markazi va uning hududiy bo‘limlari maqom ansambllarining mahalliy gastrol safarlarini tashkil etish rejasi;
- O‘zbek milliy maqom sanʼati markazi va uning hududiy bo‘limlari maqom ansambllarining korxona va tashkilotlarga gastrol safarlarini tashkil etish rejasi;
- O‘zbek milliy maqom sanʼati markazi va uning hududiy bo‘limlari maqom ansambllarining xorijiy gastrol safarlarini tashkil etish rejasi.
Hujjat qonun hujjatlari maʼlumotlari milliy bazasida eʼlon qilingan va 2023-yil 5-sentabrdan kuchga kirdi.
2021-yilda O‘zbek milliy maqom san’ati markazini Toshkentning Shayxontohur tumanidagi Olmazor ko‘chasida qurish rejalashtirilayotgani to‘g‘risida xabar berilgandi. Loyihani amalga oshirishga 93 milliard so‘m (o‘sha vaqtdagi kurs bo‘yicha 8,8 million dollar)gacha mablag‘ ajratish reja qilingan edi.
O‘zbek milliy maqom san’ati markazini davlat muassisi tarzida tashkil etish prezidentning 2017-yil noyabridagi qarorida ko‘zda tutilgan edi. Uning maqsadi etib o‘zbek maqom san’atini chuqur o‘rganish, u bilan bog‘liq ijro maktablari va an’analarni yangi bosqichda ravnaq toptirish, maqomning “oltin fondi”ni yaratish va boyitish, shuningdek, uni O‘zbekiston va chet elda keng targ‘ib qilish ko‘rsatilgan.
Prezidentning 2020-yilning yanvaridagi qarori bilan, Maqom markazining qurilishi ma’muriy, muhandislik-infratuzilma, suv xo‘jaligi, shuningdek, alohida muhim va toifalangan obyektlarni qurish va rekonstruksiya qilish manzilli dasturiga kiritilgan. Qurilishni amalga oshirish muddati etib 2020−2022-yillar etib belgilangandi.
Izoh (0)