“Ўзбек миллий мақом санъатини янада ривожлантириш ва соҳа вакиллари фаолиятини қўллаб-қувватлаш чоралари тўғрисида”ги президент қарори қабул қилинди, деб хабар беради “Норма”.
Ҳужжатга мувофиқ, 2023 йил 1-октябрдан бошлаб Ўзбек миллий мақом санъати маркази ва унинг ҳудудий бўлимлари бошқарув, илмий ва ижодий ходимларининг янгиланган ойлик иш ҳақи миқдорлари жорий этилади.
Марказнинг алоҳида шахсий ғазна ҳисобварағи ҳисобидан устамаларни белгилаш тартиби жорий этилмоқда. Бунда устамалар марказ ходимлари фаолиятининг қуйидаги йўналишларида эришилган натижалари асосида белгиланади:
- республика ҳудудларида ва хорижий давлатларда гастрол концерт-томоша тадбирларида қатнашиш;
- мумтоз мусиқа йўналишида мақом намуналарига хос асарларни яратиш ва уларни нотага олиш;
- мақом ва бастакорлар томонидан басталанган асарларни такомиллаштириш;
- ОАВ ҳамда ижтимоий тармоқлар орқали соф ва мукаммал ижродаги мақомларни тарғиб этиш;
- мумтоз мусиқа меросига оид илмий мақолалар чоп этиш, изланишлар олиб бориш, китоблар ва тўпламлар яратиш;
- мақом ва бастакорлар томонидан басталанган асарларнинг замонавий оҳангдаги караокеларини яратиш;
- “устоз-шогирд” анъаналарини давом эттириш, мақом санъатини ривожлантиришга қаратилган бошқа йўналишлар.
Ҳужжат билан 2023—2025 йилларда қуйидагиларни ташкил этиш режалари тасдиқланди:
- Ўзбек миллий мақом санъати маркази ва унинг ҳудудий бўлимлари мақом ансамблларининг маҳаллий гастрол сафарларини ташкил этиш режаси;
- Ўзбек миллий мақом санъати маркази ва унинг ҳудудий бўлимлари мақом ансамблларининг корхона ва ташкилотларга гастрол сафарларини ташкил этиш режаси;
- Ўзбек миллий мақом санъати маркази ва унинг ҳудудий бўлимлари мақом ансамблларининг хорижий гастрол сафарларини ташкил этиш режаси.
Ҳужжат қонун ҳужжатлари маълумотлари миллий базасида эълон қилинган ва 2023 йил 5 сентябрдан кучга кирди.
2021 йилда Ўзбек миллий мақом санъати марказини Тошкентнинг Шайхонтоҳур туманидаги Олмазор кўчасида қуриш режалаштирилаётгани тўғрисида хабар берилганди. Лойиҳани амалга оширишга 93 миллиард сўм (ўша вақтдаги курс бўйича 8,8 миллион доллар)гача маблағ ажратиш режа қилинган эди.
Ўзбек миллий мақом санъати марказини давлат муассиси тарзида ташкил этиш президентнинг 2017 йил ноябридаги қарорида кўзда тутилган эди. Унинг мақсади этиб ўзбек мақом санъатини чуқур ўрганиш, у билан боғлиқ ижро мактаблари ва анъаналарни янги босқичда равнақ топтириш, мақомнинг “олтин фонди”ни яратиш ва бойитиш, шунингдек, уни Ўзбекистон ва чет элда кенг тарғиб қилиш кўрсатилган.
Президентнинг 2020 йилнинг январидаги қарори билан, Мақом марказининг қурилиши маъмурий, муҳандислик-инфратузилма, сув хўжалиги, шунингдек, алоҳида муҳим ва тоифаланган объектларни қуриш ва реконструкция қилиш манзилли дастурига киритилган. Қурилишни амалга ошириш муддати этиб 2020−2022 йиллар этиб белгиланганди.
Изоҳ (0)