Toshkent shahar Yangihayot tumanida 18-iyun kuni ichida 11 kishi bo‘lgan lift pastga tezlik bilan qulab tushgani haqida xabar berilgandi. Bosh prokuraturaning holat yuzasidan “Daryo”ga qo‘shimcha ma’lumot berdi.
Qayd etilishicha, shu kuni tumandagi ko‘p qavatli uyning 2 ta fuqarolar tashish uchun mo‘ljallangan liftida ta’mirlash ishlari olib borilayotgan bo‘lgan. Shu sababli yuk tashuvchi liftida belgilangan vazndan ko‘p miqdorda, ya’ni 1 tonnadan oshiq 13 nafar fuqaro 16-qavatdan mingan. 10-qavatga kelganda tushish tezligi tezlashib 1-qavatga tushish vaqtida texnik sabablarga ko‘ra lift boshqaruvi yo‘qolgan.
Oqibatda lift ichida bo‘lgan 13 nafar fuqaroning hayoti xavf ostida qolgan. Ushbu fuqarolar shifoxonaning travmatologiya bo‘limiga olib borilgan, tibbiy yordam kursatilgan. Ularning 6 nafariga oyoq sinishi tashxisi qo‘yilib, reabilitatsiya bo‘limiga yotqizilgan. Qolgan 7 nafar fuqaroga ahvoli qoniqarli bo‘lgani sababli uyiga ruxsat berilgan.
Olib borilgan surishtiruvlar natijasida aniqlanishicha, ushbu bino “L.H” MChJ tomonidan 2022-yilning mart oyida qurilishi boshlanib, 2023-yilning may oyida foydalanishga topshirilgan. Ushbu ko‘p qavatli uyda jami 3 ta lift bo‘lib, ulardan 2 tasi aholi uchun ajratilgan bo‘lsa, 1 tasi yuk tashish uchun mo‘ljallangan.
“Yuqorida keltirib o‘tilgan ko‘p qavatli uy joriy yilning may oyida foydalanishga topshirilgan bo‘lsa-da, aholi uchun foydalanishga topshirilgan liftlar nosoz holda bo‘lgani bois fuqarolar yuk tashuvchi liftdan foydalanib kelishgan. Hozirda holat bo‘yicha tergovga qadar tekshiruv ishlari olib borilmoqda”, — deyiladi xabarda.
Izoh (0)