Ўзбекистонда тирсак бўғими жароҳатларини эндопротез ёки пластиналар эмас, балки Илизаров усули ёрдамида табиий йўл билан тиклаш амалиёти жорий этилди. Бу ҳақда Соғлиқни сақлаш вазирлиги ахборот хизмати “Дарё”га маълум қилди.
Таъкидланишича, Республика ихтисослаштирилган травматология ва ортопедия илмий-амалий тиббиёт марказида илк бор 1 ёш-у 4 ойлик боланинг ортиқча ярим тана умуртқасини олиб ташлаш жарроҳлик амалиёти ўтказилди.
“Марказда илк бор 2 нафар беморда ошиқ суягининг аваскуляр некрозида мозаик хондропластика операцияси, 1 нафар фуқарода чаноқ-сон бўғими эндопротезлари ностабиллигида ҳамда суяк дефектида аллосуяк ёрдамида нуқсонларни тўлдириш ва эндопротезлаш операциялари бажарилди.
Шунингдек, суяк синишларини даволашда блокловчи остеосинтез деб аталувчи замонавий операция усулидан фойдалана бошланди.
Мураккаб амалиётлар туманлар даражасига туширилмоқда. Андижон вилоятида илк бор сон суяги бошчасининг асептик некрозида туннелизация ва ПРП-терапия юқори технологик жарроҳлик амалиёти бажарилди”, – дейилади вазирлик ахборотида.
Қўшимча қилинишича, туғма маймоқликни Понсети усулида муолажа қилиш ўзлаштирилди. Аввало, у каминвазивлиги билан ажралиб туради. Қолаверса, тузалиш муддати қисқа ва энг муҳими, асоратсиз. Шу билан бирга, беморни муолажадан сўнг реабилитация қилишга эҳтиёж йўқ.
Ўзбекистон тиббий амалиётида ноёб йўналиш — қўл ва оёқ панжаси хирургияси бўлими ташкил этилди.
Мавзуга доир:
Изоҳ (0)