Singapur bosh vazirining sobiq o‘rinbosari Tarman Shanmugaratnam mamlakatda bo‘lib o‘tgan prezidentlik saylovlarida 70,4 foiz ovoz bilan g‘alaba qozondi. Bu haqda Sinxua axborot agentligi xabar berdi.
Uning prezidentlikdagi raqiblari Ng Kok Song va Tan Kin Lian mos ravishda 15,72 foiz hamda 13,88 foiz ovoz to‘plagan. Saylovlarda jami 2,48 milliondan ortiq singapurliklar qatnashgan.
Eslatib o‘tamiz, shu yilning 23-may kuni Singapur prezidenti Halima Yaqub ikki kunlik davlat tashrifi bilan O‘zbekistonga kelgandi. 24-may kuni Ko‘ksaroy qarorgohida Singapur rahbari Halima Yaqubni O‘zbekiston prezidenti Shavkat Mirziyoyev samimiy qarshi olgan, shuningdek, u Samarqandga “Afrosiyob” poyezdida borgan edi.
Halima Yaqub 2017-yilda prezident saylovida o‘z nomzodini ilgari surish uchun parlament raisi lavozimidan ketgandi. Singapur qonunchiligiga ko‘ra, o‘sha yilgi saylovlarga faqat malay xalqiga mansub shaxslar nomzod qo‘yishi mumkin bo‘lgan. Boisi 1970-yildan buyon bu lavozimga malaylar o‘tirmagan edi. Shu tariqa raqobat ancha pasayib ketadi va so‘nggida Halima Yaqub qiyinchilik va ortiqcha qarshiliklarsiz mamlakat prezidenti etib tayinlanadi. Aynan tayinlanadi, chunki talablarga javob beradigan boshqa nomzod qolmagan edi.
Buning ortidan Singapurda hozirgacha bir guruh fuqarolar uni lavozimga adolatsiz o‘tirganlikda ayblaydi. Jumladan, mamlakatning sobiq prezidentlaridan biri Tan Cheng Bok Halimani “Singapur tarixidagi eng ziddiyatli prezident” deb ataydi.
Halima Yaqub esa bu gaplarga quyidagicha javob bergan: “Shuni aytishim mumkinki, men Singapur xalqiga xizmat qilish uchun qo‘limdan kelganini qilishga va’da beraman. Bu saylovlar o‘tkazilishi yoki o‘tkazilmasligidan qat’iy nazar, o'zgarmaydi”.
Izoh (0)