Ҳиндистон Қуёшни тадқиқ қилишга мўлжалланган Адитя-Л1 автоматик станциясини муваффақиятли учирди, деб хабар бермоқда Ҳиндистон космик тадқиқотлар ташкилоти (ISRО).
Бортида Адитя-Л1 станцияси бўлган PSLV C57 (Polar Sattelite Launch Vehicle) ракета-ташувчиси Бенгал кўрфазидаги Шрихарикота оролида миллий космодромдан учирилган.
“Қурилма сунъий йўлдошни мўлжалланган орбитага аниқ олиб чиқди. Ҳиндистоннинг биринчи Қуёш обсерваторяси Қуёш-Ер тизимининг Л1 нуқтасига сафарини бошлади”, — дейилади ташкилот хабарида.
Л1 нуқтаси Ердан тахминан 1,5 миллион километр узоқликда жойлашган. Ҳиндистон станция Ер орбитасида 16 кун туриши, сўнг яна 110 кун Л1 га томон юриши керак.
Адитя-Л1 — Қуёшни ўрганиш бўйича биринчи ҳинд миссияси. Унинг асосий мақсадлари — Қуёш хромосфераси ва тожини ўрганиш, магнит майдон ва зарралар оқимини ўлчаш. Бортда еттита асбоб бор: тўрттаси масофадан зондлаш, учтаси жойида кузатишга мўлжалланган.
Эслатиб ўтамиз, 23 август куни Ҳиндистоннинг “Викрам” аппарати “Прагян” луноходи билан Ой юзасига муваффақиятли қўнганди. Луноход Ой юзасининг элементар таркиби ҳақида илғор билимларни тақдим этиши кутилмоқда.
Ҳиндистон миссияси тарихда биринчи марта Ер сунъий йўлдошининг кам ўрганилган жанубий қутби яқинига қўнишга муваффақ бўлди. Олимларнинг фикрича, бу ҳудудда муз ҳолатидаги сув ва қимматли элементларнинг катта захиралари бўлиши мумкин.
Изоҳ (0)