Hindistonning “Vikram” kosmik apparati Oydan birinchi ma’lumotni uzatdi: Yerning tabiiy yo‘ldoshi tuprog‘i kutilganidan issiqroq bo‘lib chiqdi, deb yozmoqda Press Trust of India.
Hind kosmik agentligining katta olimi Bi Darukeshning aytishicha, Oy yuzasining termal xarakterini tushunish uchun yuza termofizikasi tajribasi doirasida Oy tuprog‘ining yuqori qatlami harorati o‘lchangan.
“Biz hammamiz yuza harorati Selsiy bo‘yicha 20 dan 30 darajagacha bo‘lishi mumkin deb o‘ylagandik, lekin u 70 daraja bo‘lib chiqdi. Bu biz kutganimizdan hayratlanarli darajada yuqori”, — dedi Darukesh.
Eslatib o‘tamiz, 23-avgust kuni Hindistonning “Vikram” apparati “Pragyan” lunoxodi bilan Oy yuzasiga muvaffaqiyatli qo‘ngandi. Lunoxod Oy yuzasining elementar tarkibi haqida ilg‘or bilimlarni taqdim etishi kutilmoqda. Qurilmaga rentgen alfa-zarrachalar spektrometri va lazer yordamida boshqariladigan spektroskop o‘rnatilgan. Detektorlar “Vikram” moduliga ham o‘rnatilgan.
Hindiston missiyasi tarixda birinchi marta Yer sun’iy yo‘ldoshining kam o‘rganilgan janubiy qutbi yaqiniga qo‘nishga muvaffaq bo‘ldi. Olimlarning fikricha, bu hududda muz holatidagi suv va qimmatli elementlarning katta zahiralari bo‘lishi mumkin.
Izoh (0)