Shavkat Mirziyoyev O‘zbekiston mustaqilligining 32 yilligiga bag‘ishlangan tantanali marosimda nutq so‘zlab, O‘zbekiston iqtisodiyotining yaqin kelajakdagi asosiy lokomotivlariga aylanadigan yo‘nalishlar haqida gapirdi.
Prezident o‘zbek xalqi avvalo ilm-maʼrifat, maʼnaviy boylik yetkazib bergan ne-ne ulug‘ zotlarning avlodi ekanini qayd etgan.
“Agar 3 ming yillik tariximizga nazar tashlaydigan bo‘lsak, ota-bobolarimiz asrlar mobaynida dunyo tamadduniga nafaqat jismoniy, balki intellektual mehnati bilan ulkan hissa qo‘shganiga guvoh bo‘lamiz.
Biz jahonga faqat xomashyo emas, avvalo ilm-maʼrifat, maʼnaviy boylik yetkazib bergan ne-ne ulug‘ zotlarning avlodimiz. Hech shubhasiz, ularga xos bo‘lgan buyuk fazilatlar, ular yaratgan shonli anʼanalar bugun ham bizning qalbimizda, ongimizda, hayotimizda yashamoqda”, — deya taʼkidlagan Shavkat Mirziyoyev.
Davlat rahbari, shuningdek, O‘zbekiston iqtisodiyotining yaqin kelajakdagi asosiy lokomotivlariga aylanadigan yo‘nalishlar haqida aytib o‘tgan.
“Men ishonaman, biz bu tarixiy yo‘lni munosib davom ettirishga har tomonlama qodirmiz. Bugungi kunda dunyo xaritasida tutgan o‘rnimiz, o‘z oldimizga qo‘yayotgan juda ulkan maqsad va marralarimiz ham aynan shuni taqozo etmoqda.
Shundan kelib chiqqan holda, biz transport-logistika tizimi bilan birga, bugun zamonning o‘zi talab qilayotgan ilm-fan, innovatsiya, IT va aqliy mehnatga asoslangan boshqa sohalarni jadal rivojlantirishga ustuvor ahamiyat qaratyapmiz. Aynan shu yo‘nalishlar O‘zbekiston iqtisodiyotining yaqin kelajakdagi asosiy lokomotivlariga aylanadi”, — deydi prezident.
Izoh (0)