Шавкат Мирзиёев Ўзбекистон мустақиллигининг 32 йиллигига бағишланган тантанали маросимда нутқ сўзлаб, Ўзбекистон иқтисодиётининг яқин келажакдаги асосий локомотивларига айланадиган йўналишлар ҳақида гапирди.
Президент ўзбек халқи аввало илм-маърифат, маънавий бойлик етказиб берган не-не улуғ зотларнинг авлоди эканини қайд этган.
“Агар 3 минг йиллик тарихимизга назар ташлайдиган бўлсак, ота-боболаримиз асрлар мобайнида дунё тамаддунига нафақат жисмоний, балки интеллектуал меҳнати билан улкан ҳисса қўшганига гувоҳ бўламиз.
Биз жаҳонга фақат хом ашё эмас, аввало илм-маърифат, маънавий бойлик етказиб берган не-не улуғ зотларнинг авлодимиз. Ҳеч шубҳасиз, уларга хос бўлган буюк фазилатлар, улар яратган шонли анъаналар бугун ҳам бизнинг қалбимизда, онгимизда, ҳаётимизда яшамоқда”, — дея таъкидлаган Шавкат Мирзиёев.
Давлат раҳбари, шунингдек, Ўзбекистон иқтисодиётининг яқин келажакдаги асосий локомотивларига айланадиган йўналишлар ҳақида айтиб ўтган.
“Мен ишонаман, биз бу тарихий йўлни муносиб давом эттиришга ҳар томонлама қодирмиз. Бугунги кунда дунё харитасида тутган ўрнимиз, ўз олдимизга қўяётган жуда улкан мақсад ва марраларимиз ҳам айнан шуни тақозо этмоқда.
Шундан келиб чиққан ҳолда, биз транспорт-логистика тизими билан бирга, бугун замоннинг ўзи талаб қилаётган илм-фан, инновация, IT ва ақлий меҳнатга асосланган бошқа соҳаларни жадал ривожлантиришга устувор аҳамият қаратяпмиз. Айнан шу йўналишлар Ўзбекистон иқтисодиётининг яқин келажакдаги асосий локомотивларига айланади”, — дейди президент.
Изоҳ (0)