Shavkat Mirziyoyev O‘zbekiston mustaqilligining 32 yilligiga bag‘ishlangan tantanali marosimda nutq so‘zladi. Prezident matbuot xizmati ushbu nutq matnini e’lon qildi.
Quyida u to‘lig‘icha havola etildi.
Assalomu alaykum, qadrli vatandoshlar!
Muhtaram otaxon va onaxonlar!
Yurtimiz kelajagi bo‘lgan yoshlar!
Hurmatli mehmonlar!
Bundan roppa-rosa o‘ttiz ikki yil muqaddam O‘zbekiston o‘z mustaqilligini e’lon qildi. O‘tgan davrda biz qancha sinovlarni boshimizdan o‘tkazdik, ko‘plab qiyinchilik va mashaqqatlarni birgalikda yengdik.
O‘ttiz ikki yil avval tug‘ilgan go‘dak bugun o‘zining mustaqil fikri, dunyoqarashi, orzu-istaklari va maqsadlariga ega shaxs sifatida voyaga yetdi. Xuddi shu singari, bugungi O‘zbekiston ham, o‘tgan davrda turli sinovlarda toblanib, tajriba orttirib, o‘zining aniq maqsadi va yo‘li, pozitsiyasiga ega bo‘lgan katta davlat sifatida shakllandi.
Bu – butun xalqimizning tarixiy yutug‘i. Unda har biringizning munosib hissangiz bor!
Siz, azizlarning Vatanga mehr va sadoqat bilan qilayotgan har kunlik mehnatingiz O‘zbekiston mustaqilligini yanada mustahkamlashga xizmat qilmoqda. Shu ma’noda, Istiqlol bayrami – barchamizning bayramimiz, mustaqil O‘zbekiston – barchamizning faxrimiz, iftixorimiz, desak, ayni haqiqatni aytgan bo‘lamiz.
Mana shu shukuhli damlarda har qanday sharoitda ham o‘z kasbiga sodiq qolib, yosh avlodimizga ilm-fan asoslarini o‘rgatib kelayotgan hurmatli muallim va murabbiylarni, xalq salomatligi yo‘lida o‘zini ayamasdan xizmat qilayotgan jonkuyar shifokorlarni, el-yurt dasturxonini yanada to‘kin qilish uchun dalalarimizda fidokorona mehnat qilayotgan mirishkor dehqon va fermerlarimizni, ona yurtimiz qalqonlari bo‘lgan jasur harbiylarimizni, iqtisodiyotimiz rivoji, xalqimiz farovonligini oshirish yo‘lida jonbozlik ko‘rsatayotgan tadbirkorlarimizni, o‘zining dastlabki yutuqlari bilan barchamizni xursand qilayotgan azm-u shijoatli yoshlarimizni, qalb to‘la mehri, ulug‘ fazilatlari bilan xonadonlarimiz ustuni bo‘lib kelayotgan hurmatli opa-singillarimizni, har bir ishda duogo‘y bo‘lib, bizga Yaratgandan kuch va madad tilab turgan muhtaram otaxon va onaxonlarimizni, dunyoning qaysi o‘lkasida bo‘lsa ham, O‘zbekiston sog‘inchi bilan yashayotgan aziz vatandoshlarimizni, bir so‘z bilan aytganda, 36 millionlik butun xalqimizni bugungi ulug‘ bayram bilan chin qalbimdan samimiy tabriklayman.
Istiqlol ayyomi barchamizga muborak bo‘lsin!
Qadrli do‘stlar!
Albatta, O‘zbekiston o‘z suvereniteti, davlat mustaqilligiga osonlik bilan erishgani yo‘q. Bu yo‘lda ajdodlarimizning siyosiy va ma’rifiy intilishlari so‘nggi bir yarim asr davomida deyarli to‘xtamadi. Hurriyat uchun kurashgan ko‘plab Vatan fidoyilari qatag‘on etildi, istiqlolga intilgan millat qahramonlari zulm va zo‘ravonlik qurboni bo‘ldi.
Biz yurt ozodligi yo‘lida kurashgan, nohaq ayblanib, bu dunyodan armon bilan ketgan vatandoshlarimizning pok nomlarini tiklashni o‘z oldimizga maqsad qilib qo‘ygan edik. So‘nggi uch yilda ularning 856 nafari Oliy sud tomonidan oqlandi. Biz bunday ezgu ishlarni albatta davom ettiramiz. Zero, bu masalada adolat qaror topishi shart.
O‘tmishga nazar tashlar ekanmiz, achchiq bir haqiqatni tan olishga majburmiz: “o‘zbek” deganda, faqat ertayu kech paxta dalasida mehnat qiladigan zahmatkash insonlar tasavvur qilinar edi. Afsuski, shu darajaga tushib qolgan edik.
Paxta hukmronligi o‘zbekning peshonasiga yozilgan balo bo‘ldi. Paxta siyosati Orolni quritdi, ekologiyamizni inqirozga olib keldi, iqtisodiyotimizni, ta’lim tizimini izdan chiqardi. Oqibatda bir necha avlod chalasavod bo‘lib voyaga yetdi. Biz buning asoratlari bilan haligacha kurashyapmiz.
Bugun paxtachilikda bozor iqtisodiyoti tamoyillari joriy etilib, soha o‘z egasini topdi. Natijada o‘qituvchi maktabga, shifokor shifoxonaga qaytdi, tadbirkorlar paxta “o‘lponi”dan ozod bo‘ldi, majburiy va bolalar mehnatiga chek qo‘yildi. O‘zbekiston xalqaro “qora ro‘yxatlar”dan chiqarildi.
Barchamizning fidokorona mehnatimiz, g‘ayrat-u shijoatimiz bilan Yangi O‘zbekiston orzusi real haqiqatga aylanmoqda. Xalqaro maydonda Vatanimizga nisbatan hurmat va e’tibor tobora ortib bormoqda.
Prezident sifatida dastlabki ishlarimdan biri qo‘shni mamlakatlar bilan do‘stona munosabatlarni o‘rnatish bo‘ldi. Yillar davomida yechimini kutayotgan muammolar hal etildi. Buning natijasida Markaziy Osiyo davlatlari bilan barcha sohalardagi aloqalarimiz yangi bosqichga chiqdi.
Qadrli yurtdoshlar!
Siyosiy mustaqillik zamirida eng avvalo iqtisodiy mustaqillik yotishi hech kimga sir emas. Oxirgi yillarda amalga oshirgan ishlarimiz, erishgan natijalarimiz bu yo‘lda mustahkam poydevor bo‘lib xizmat qilmoqda. So‘nggi 6 yilda yurtimizda yalpi ichki mahsulot hajmi 1,5 martadan ziyod, tadbirkorlik subyektlari soni 2 karra ko‘paygani, sanoatdagi o‘sish 40 foizdan oshgani buni yaqqol tasdiqlaydi. Qisqa muddatda kambag‘allikni 2 barobardan ziyod qisqartirishga erishdik.
Lekin biz bugun bilan kechagi kunni emas, bugun bilan ertangi kunni taqqoslashimiz, ishimizni shu asosda tashkil etishimiz kerak. Chunki, kelajak bugun biz tashlayotgan qadamlardan boshlanadi.
Aziz do‘stlar!
Biz mutafakkir zotlarning: “Davlatning vazifasi insonlarni baxtli-saodatli qilishdir. Bu maqsadga esa ilm va yaxshi axloq yordamida erishiladi”, degan hikmatli so‘zlarini o‘zimiz uchun dastur deb bilamiz.
Ma’lumki, biz bir yil avval taraqqiyotimizning 5 ta asosiy yo‘nalishini belgilab olgan edik. Unda ta’lim sohasini rivojlantirish birinchi galdagi ustuvor vazifa sifatida qayd etilgan.
Men doimo ta’lim, ta’lim, muallim, muallim, deb ta’kidlashim bejiz emas. Chunki ta’limni rivojlantirmasdan turib yuksak taraqqiyotga erisha olmaymiz. Har qanday muammoning yechimi ham, ertangi kunimizni hal qiluvchi omil ham, shubhasiz, ta’limdir.
2022-yili mamlakatimizda 72 ta yangi maktab qurildi, 279 tasi kapital ta’mirdan chiqarildi, 514 ta maktab esa rekonstruksiya qilindi. Maktablar uchun 30 mingdan ortiq kompyuter xarid qilindi. Yangi o‘quv yilidan respublikamiz maktablarida xorijdan maxsus taklif etilgan 500 nafar ingliz tili mutaxassislari bolalarimizga dars beradi. Boshlang‘ich sinf o‘quvchilari ilg‘or xorijiy tajriba asosida ishlab chiqilgan yangi dastur va darsliklar bo‘yicha o‘qiy boshlaydilar.
Xuddi shu kabi, sog‘liqni saqlash, biznesni rivojlantirish, sud tizimini takomillashtirish hamda suv va yoqilg‘i-energetika muammolarini hal etish yuzasidan katta loyihalar boshlangan. Yana bir bor ta’kidlayman: ushbu belgilangan ustuvor yo‘nalishlar bizning doimiy e’tiborimiz markazida bo‘ladi.
Hurmatli bayram ishtirokchilari!
Agar 3 ming yillik tariximizga nazar tashlaydigan bo‘lsak, ota-bobolarimiz asrlar mobaynida dunyo tamadduniga nafaqat jismoniy, balki intellektual mehnati bilan ulkan hissa qo‘shganiga guvoh bo‘lamiz.
Biz jahonga faqat xomashyo emas, avvalo ilm-ma’rifat, ma’naviy boylik yetkazib bergan ne-ne ulug‘ zotlarning avlodimiz. Hech shubhasiz, ularga xos bo‘lgan buyuk fazilatlar, ular yaratgan shonli an’analar bugun ham bizning qalbimizda, ongimizda, hayotimizda yashamoqda.
Men ishonaman, biz bu tarixiy yo‘lni munosib davom ettirishga har tomonlama qodirmiz. Bugungi kunda dunyo xaritasida tutgan o‘rnimiz, o‘z oldimizga qo‘yayotgan juda ulkan maqsad va marralarimiz ham aynan shuni taqozo etmoqda.
Shundan kelib chiqqan holda, biz transport-logistika tizimi bilan birga, bugun zamonning o‘zi talab qilayotgan ilm-fan, innovatsiya, IT va aqliy mehnatga asoslangan boshqa sohalarni jadal rivojlantirishga ustuvor ahamiyat qaratyapmiz. Aynan shu yo‘nalishlar O‘zbekiston iqtisodiyotining yaqin kelajakdagi asosiy lokomotivlariga aylanadi.
Muhtaram do‘stlar!
Bugun bizning oldimizda turgan yana bir muhim masala – ekologik muammolar va suv tanqisligidir. Tarozining bir pallasida o‘sib borayotgan qurilishlar, ishlab chiqarish, qishloq xo‘jaligi turgan bo‘lsa, ikkinchi pallasida har birimiz uchun eng zarur bo‘lgan suvni tejash, atrof-muhit ifloslanishining oldini olish va yer resurslaridan oqilona foydalanish masalasi turibdi.
Bizning vazifamiz – har ikki yo‘nalishda ham muvozanatni saqlashdan iborat. Hech qachon unutmasligimiz lozimki, tabiiy resurslar – bu kelajak avlodlarimizga ham tegishli bo‘lgan boylikdir. Shu bois, ulardan nafaqat bugungi, balki ertangi kunimizni ham o‘ylab, oqilona foydalanishimiz zarur.
Bu borada suvni, energiya va boshqa tabiiy resurslarni tejaydigan iqtisodiyotga tezroq o‘tish muhim ahamiyatga ega. Biz uchun “yashil” va raqamli texnologiyalar, innovatsion ishlab chiqarish korxonalarini barpo etish vazifasi ham dolzarb bo‘lib turibdi.
Qadrli yurtdoshlar!
Yangilangan Konstitutsiyamizda O‘zbekistonning dunyoviy davlat va turli madaniyatlarni birlashtirgan makon ekani aniq belgilab qo‘yildi. Bizning kuch-qudratimiz – mana shunda, biz bu boylikni ko‘z qorachig‘idek asrashimiz kerak. Tarixga qaraydigan bo‘lsak, asrlar davomida yurtimizda turli xil e’tiqod va qarashlar, dinlar, madaniyatlar bag‘rikenglik bilan qabul qilinganini ko‘ramiz.
Biz – nizolarni urush bilan emas, tinchlik bilan hal etish yo‘lini tanlaydigan xalqmiz. Biz barcha xalqlar bilan hamisha murosayi madora, do‘stlik va hamkorlikda yashab kelganmiz. Bugungi taraqqiyot yo‘limizda ham aynan shu tamoyillarga tayanamiz.
Bizga, birinchi navbatda, kuchli fuqarolik jamiyati zarur, chunki har qanday islohot har birimizning yuragimizdan, ongimizdan boshlanishi lozim. Adolatli qonunlar bo‘yicha vijdonan yashashga tayyor bo‘lishimiz, mamlakat kelajagi uchun bir yoqadan bosh chiqarib, olg‘a qadam bosmog‘imiz kerak.
Bugun rivojlangan fuqarolik jamiyatini shakllantirish haqida gap borar ekan, buni so‘z va matbuot erkinligisiz tasavvur qilib bo‘lmaydi. Butun dunyoda jurnalistlar o‘zlari va jamiyatni o‘ylantirayotgan, xavotirga solayotgan mavzular haqida gapirish va yozish huquqi uchun, haqiqat uchun kurashganlar va bundan keyin ham kurashadilar.
Ammo, ishonch bilan ayta olamanki, men erkin fikrli jurnalistlar tarafida bo‘lganman va doimo shu pozitsiyada bo‘laman. Ayni vaqtda axborot makonida haqqoniylik va xolislik bosh mezon bo‘lishi kerak.
Hurmatli bayram qatnashchilari!
Buyuk ma’rifatparvar bobomiz Abdurauf Fitrat ta’biri bilan aytganda, “xotin-qizlar – bu millat onalaridir”. Ular millatning yangi nasli – farzandlarini tarbiyalash uchun o‘zlari ham yuksak bilimli bo‘lishlari zarur.
Shunday ekan, oldimizda turgan yana bir muhim vazifa – jamiyat hayotining barcha sohalarida ayollar uchun teng imkoniyatlar yaratishdir. Hurmatli xotin-qizlarimizning jamiyatdagi o‘rni va nufuzini oshirish, ularning huquq va manfaatlarini, kasb sohasi bo‘yicha o‘sishini ta’minlash borasida o‘tgan davrda ko‘p ishlarni amalga oshirdik. Shu bilan birga, bu yo‘nalishda qiladigan ishlarimiz ham oz emas.
Ma’lumki, muhtarama ayollarimiz zimmasida xizmat sohasidagi vazifasidan tashqari, farzandlar tarbiyasi, oilada sog‘lom muhitni mustahkamlash, axloqiy-ma’naviy an’analarni davom ettirishdek murakkab vazifalar ham bor. Shunday ekan, mehribon opa-singillarimizni har qancha qo‘llab-quvvatlasak, arziydi.
Mana, bu yil oiladagi zo‘ravonlikka qarshi qonunni qabul qildik. Bundan ko‘zlangan asosiy maqsad – oilalar mustahkamligini, ayollarimizning baxti va himoyasini ta’minlashdir. Biz bu yo‘nalishdagi ishlarimizni bundan keyin ham izchil davom ettiramiz.
Aziz yurtdoshlar!
O‘zbekistonning har bir farzandi xalqimizning birdamligi, mamlakat yaxlitligi uchun kurashib yashashni o‘z hayotining ma’nosi deb bilmog‘i kerak!
Biz bir bo‘lsak – yagona xalqmiz, birlashsak – Vatanmiz!
Hurmatli yurtdoshlar!
Insoniyat oxirgi besh-olti yil mobaynida so‘nggi yuz yil davomida o‘z boshidan o‘tkazishi mumkin bo‘lgan barcha sinovlar bilan yuzma-yuz kelgani sizlarga ma’lum.
Bu pandemiya bo‘ladimi, tabiiy ofatlar, zilzilalar bo‘ladimi, qurolli to‘qnashuvlar, global isish hamda qurg‘oqchilik bo‘ladimi – barchasi bashariyatni qattiq sinovdan o‘tkazdi va o‘tkazmoqda. Mazkur murakkab vaziyatni, ta’bir joiz bo‘lsa, kuchli va qattiq to‘fonga qiyoslash mumkin.
Bunday ofatlar oqibatida “manaman” degan daraxtlarning ham barglari uzilishi, shoxlari sinishi, kurtaklari to‘kilishi, hatto mevalari nobud bo‘lishi mumkin. Lekin ildizi mustahkam va chuqur bo‘lgan daraxtlar yiqilmaydi. Aksincha, yerga o‘sha tomirlari bilan yanada mahkam bog‘lanadi. Qayta kurtak yozadi, mevalar tugaveradi. Bu – hayot qonuni.
Bizning qadimiy va mustahkam ildizlarimiz bor. Bu – bizning tariximiz, qadriyat va an’analarimiz, urf-odatlarimiz, milliy o‘zligimizdir. Men ana shu teran ildizlarimizda yurtni, millatni birlashtiradigan buyuk bir g‘oyani ko‘raman.
Biz Vatanimiz mustaqilligi, xalqimiz tinchligini ta’minlashning ishonchli kafolati bo‘lgan Qurolli Kuchlarimiz salohiyatini oshirishga, harbiy xizmatchilar va ularning oilalari uchun yanada munosib sharoit yaratishga alohida e’tibor qaratamiz.
Dunyoning olis va yaqin mamlakatlari, ayniqsa, qo‘shni davlatlar, xalqaro va mintaqaviy tashkilotlar bilan do‘stlik va o‘zaro manfaatli hamkorlik aloqalarini yangi bosqichga olib chiqamiz. Bu borada mamlakatimiz va xorijiy davlatlar diplomatlarining xizmatlarini alohida ta’kidlash lozim.
Mana shu imkoniyatdan foydalanib, bugungi tantanali marosimda xorijiy davlatlarning hurmatli elchilari, xalqaro tashkilotlar vakillari ishtirok etayotganidan mamnun ekanimni bildirib, ularning mamlakatlari va xalqlariga tinchlik va ravnaq tilayman.
Aziz va muhtaram vatandoshlar!
Barchangiz bir haqiqatni bilishingizni istardim. Bizning jamiki sa’y-harakatlarimiz mamlakatimiz ravnaqi uchun, o‘z Vataniga sadoqatli xalqimiz uchun, sizlar uchun, aziz yurtdoshlar!
Bugun oldimizda turgan vazifalar qanchalik ulkan va murakkab bo‘lmasin, ularni birgalikda hal etishga kuchimiz ham, imkoniyatimiz ham yetadi.
Biz endi kechagi odamlar emasmiz. Xalqimiz ham kechagi xalq emas.
Tarixdan ma’lum: vaqtni – imkoniyatga, imkoniyatni – yutuqqa, yutuqni taraqqiyot poydevoriga aylantira olgan xalq – buyuk xalqdir. Bugun mehnatkash, mard va olijanob, mehr-oqibatli elimiz ayni shunday xalq bo‘lib maydonga chiqmoqda.
Fursatdan foydalanib, Yangi O‘zbekistonni barpo etishda fidokorona mehnat qilib kelayotgan barcha yurtdoshlarimizga, ona xalqimga chin qalbimdan minnatdorlik bildiraman.
Siz, azizlarni, kattayu kichik barcha vatandoshlarimni bugungi ulug‘ ayyom – O‘zbekiston Respublikasi mustaqilligining o‘ttiz ikki yilligi bilan yana bir bor chin qalbimdan tabriklayman.
Barchangizga sihat-salomatlik, xonadonlaringizga baxt-u saodat, fayz-u baraka tilayman.
Barcha yutuq va g‘alabalarimizning ijodkori va bunyodkori bo‘lgan xalqimiz hamisha omon bo‘lsin! Go‘zal yurtimizda tinchlik va osoyishtalik bardavom bo‘lsin!
Jonajon Vatanimizga ko‘z tegmasin!
Mustaqilligimiz abadiy bo‘lsin!
Izoh (0)