Shavkat Mirziyoyev O‘zbekiston mustaqilligining 32 yilligiga bag‘ishlangan tantanali marosimda nutq so‘zlab, jamiyat hayotining barcha sohalarida ayollar uchun teng imkoniyatlar yaratish muhim vazifalardan biri ekanini bildirdi.
“Buyuk maʼrifatparvar bobomiz Abdurauf Fitrat taʼbiri bilan aytganda, “xotin-qizlar – bu millat onalaridir”. Ular millatning yangi nasli – farzandlarini tarbiyalash uchun o‘zlari ham yuksak bilimli bo‘lishlari zarur.
Shunday ekan, oldimizda turgan yana bir muhim vazifa – jamiyat hayotining barcha sohalarida ayollar uchun teng imkoniyatlar yaratishdir. Hurmatli xotin-qizlarimizning jamiyatdagi o‘rni va nufuzini oshirish, ularning huquq va manfaatlarini, kasb sohasi bo‘yicha o‘sishini taʼminlash borasida o‘tgan davrda ko‘p ishlarni amalga oshirdik. Shu bilan birga, bu yo‘nalishda qiladigan ishlarimiz ham oz emas.
Maʼlumki, muhtarama ayollarimiz zimmasida xizmat sohasidagi vazifasidan tashqari, farzandlar tarbiyasi, oilada sog‘lom muhitni mustahkamlash, axloqiy-maʼnaviy anʼanalarni davom ettirishdek murakkab vazifalar ham bor. Shunday ekan, mehribon opa-singillarimizni har qancha qo‘llab-quvvatlasak, arziydi”, — deydi prezident.
Davlat rahbari, shuningdek, oiladagi zo‘ravonlikka qarshi qonunning qabul qilinishidan asosiy maqsad oilalar mustahkamligini, ayollarning baxti va himoyasini taʼminlash ekanini qayd etgan.
“Mana, bu yil oiladagi zo‘ravonlikka qarshi qonunni qabul qildik. Bundan ko‘zlangan asosiy maqsad – oilalar mustahkamligini, ayollarimizning baxti va himoyasini taʼminlashdir. Biz bu yo‘nalishdagi ishlarimizni bundan keyin ham izchil davom ettiramiz”, — deydi Shavkat Mirziyoyev.
Izoh (0)