Hozirda O‘zbekistonda kuniga 70-75 ming nafar fuqaroga davlat xizmatlari ko‘rsatiladi. Besh yil avval esa har kuni 15-17 ming kishi davlat xizmatlaridan foydalangan. Bu haqda Adliya vazirligi “Daryo”ga maʼlum qildi.
Qayd etilishicha, 2018-yil 1-yanvarda Davlat xizmatlari markazlari faoliyat boshlagan va dastlab 37 turdagi davlat xizmatlari ko‘rsatilgan. Bugungi kunda 310 dan ortiq davlat xizmatlari ko‘rsatilmoqda. Aholi uchun markazlar xizmatlaridan onlayn ravishda ham foydalanish imkoniyati yaratilgan. Bundan faqat ID karta olish, xorijga chiqish biometrik pasportini rasmiylashtirish, yuridik shaxslarni qayta tashkil etish xizmatlari mustasno.
“2018-yilda kuniga o‘rtacha 15-17 ming fuqaro Davlat xizmatlari markazlarida xizmatlardan foydalangan bo‘lsa, bugungi kunda bu ko‘rsatkich 70-75 mingni tashkil etmoqda. Davlat xizmatlari markazlari tomonidan hozirga qadar 52 milliondan ortiq davlat xizmatlari ko‘rsatildi. Eng eʼtiborlisi, Davlat xizmatlari markazlarida ish hajmi qariyb 4 baravarga ko‘paygan bo‘lsa-da, xodimlar soni ko‘paytirilmadi”,—deyiladi manba axborotida.
Maʼlum qilinishicha, Yevropa Ittifoqi hamda BMTning Taraqqiyot dasturi loyihasi doirasida Pricewaterhouse Coopers xalqaro kompaniyalar tarmog‘i tomonidan Davlat xizmatlari markazlariga tashrif buyuruvchilar o‘rtasida anonim so‘rov o‘tkazilgan. So‘rovnoma natijasiga ko‘ra, fuqarolarning 90 foizi ko‘rsatilayotgan xizmatlardan qoniqish hosil qilib, markaz xodimlari faoliyatini aʼlo baholagan.
“Davlat xizmatlaridan foydalangan 95 foizdan ortiq fuqaro Davlat xizmatlari markazlarida o‘rnatilgan Q-matic tizimi orqali operatorlar faoliyatini 5 turdagi bahodan (“Juda yaxshi”, “Yaxshi”, “Qoniqarli”, “Yomon” va “Juda yomon”) “juda yaxshi” deb baholagan”,—deya qayd etgan manba.
Vazirlikka ko‘ra, joriy yil yakunigacha davlat xizmatlari markazlari orqali ko‘rsatiladigan xizmatlar turlari kamida 350 taga, kelgusi yil oxiriga qadar 450 taga yetkaziladi.
Izoh (0)