Ҳозирда Ўзбекистонда кунига 70-75 минг нафар фуқарога давлат хизматлари кўрсатилади. Беш йил аввал эса ҳар куни 15-17 минг киши давлат хизматларидан фойдаланган. Бу ҳақда Адлия вазирлиги “Дарё”га маълум қилди.
Қайд этилишича, 2018 йил 1 январда Давлат хизматлари марказлари фаолият бошлаган ва дастлаб 37 турдаги давлат хизматлари кўрсатилган. Бугунги кунда 310 дан ортиқ давлат хизматлари кўрсатилмоқда. Аҳоли учун марказлар хизматларидан онлайн равишда ҳам фойдаланиш имконияти яратилган. Бундан фақат ID карта олиш, хорижга чиқиш биометрик паспортини расмийлаштириш, юридик шахсларни қайта ташкил этиш хизматлари мустасно.
“2018 йилда кунига ўртача 15-17 минг фуқаро Давлат хизматлари марказларида хизматлардан фойдаланган бўлса, бугунги кунда бу кўрсаткич 70-75 мингни ташкил этмоқда. Давлат хизматлари марказлари томонидан ҳозирга қадар 52 миллиондан ортиқ давлат хизматлари кўрсатилди. Энг эътиборлиси, Давлат хизматлари марказларида иш ҳажми қарийб 4 бараварга кўпайган бўлса-да, ходимлар сони кўпайтирилмади”,—дейилади манба ахборотида.
Маълум қилинишича, Европа Иттифоқи ҳамда БМТнинг Тараққиёт дастури лойиҳаси доирасида Pricewаterhouse Coopers халқаро компаниялар тармоғи томонидан Давлат хизматлари марказларига ташриф буюрувчилар ўртасида аноним сўров ўтказилган. Сўровнома натижасига кўра, фуқароларнинг 90 фоизи кўрсатилаётган хизматлардан қониқиш ҳосил қилиб, марказ ходимлари фаолиятини аъло баҳолаган.
“Давлат хизматларидан фойдаланган 95 фоиздан ортиқ фуқаро Давлат хизматлари марказларида ўрнатилган Q-matic тизими орқали операторлар фаолиятини 5 турдаги баҳодан (“Жуда яхши”, “Яхши”, “Қониқарли”, “Ёмон” ва “Жуда ёмон”) “жуда яхши” деб баҳолаган”,—дея қайд этган манба.
Вазирликка кўра, жорий йил якунигача давлат хизматлари марказлари орқали кўрсатиладиган хизматлар турлари камида 350 тага, келгуси йил охирига қадар 450 тага етказилади.
Изоҳ (0)