Tashqi ishlar vaziri Baxtiyor Saidov 29-avgust kuni Bangladeshning O‘zbekistonga yangi tayinlangan elchisi Muhammad Monirul Islomni qabul qildi. Bu haqda vazir o‘zining Telegram’dagi kanaliga yozib qoldirdi.
“Bangladeshning O‘zbekistondagi favqulodda va muxtor elchisi etib tayinlangan Muhammad Monirul Islom janoblaridan ishonch yorliqlari nusxalarini olishdan mamnunmiz. O‘zbekiston va Bangladesh izchil iqtisodiy o‘sish surʼatlarini ko‘rsatmoqda, maqsadlarimiz mushtarak, hamkorlikni yanada rivojlantirish uchun keng imkoniyatlar mavjud. O‘zbekiston Tashqi ishlar vazirligi o‘zaro aloqalarni barcha sohalarda jadallashtirishga tayyor”, — deb yozadi TIV rahbari.
Muhammad Monirul Islom 2020—2023-yillarda Bangladeshning Toshkentdagi elchixonasiga rahbarlik qilgan Muhammad Jahongir Alam o‘rnini egalladi.
Yangi elchi 48 yoshda. 2001-yildan beri Bangladesh TIV tizimida ishlab kelmoqda. U Toshkentga tayinlangunga qadar o‘z mamlakatining Istanbul va Nyu-Yorkdagi bosh konsulliklarida ishlagan.
Bundan oldin, Furqat Siddiqov o‘rindoshlik asosida O‘zbekistonning Braziliyadagi elchisi etib tayinlangani, Turkmanistonning yangi elchisi O‘zbekistonda ish boshlagani, Malayziyaning O‘zbekistondagi yangi elchisi tayinlangani to‘g‘risida xabar berilgandi.
Izoh (0)