O‘zbekistonda abituriyentlarning 56,9 foizi beshtagacha ta’lim yo‘nalishini tanlash imkoniyatidan foydalangan holda talabalikka tavsiya etilgan. Bu haqda Bilim va malakalarni baholash agentligi ma’lum qildi.
2023—2024-o‘quv yili uchun OTMlar bakalavriat ta’lim yo‘nalishlariga kirish test sinovi natijalariga ko‘ra 193 421 nafar abituriyent talabalikka tavsiya etilgandi.
Shundan 180 ming nafarga yaqini umumiy qabul parametrlari doirasida o‘qishga qabul qilingan bo‘lib, ularning:
- 77 520 nafari (43,1 foizi) — birinchi ta’lim yo‘nalishiga;
- 102 279 nafari (56,9 foizi) — ikkinchi-beshinchi ta’lim yo‘nalishiga talabalikka tavsiya etilgan.
Bilim va malakalarni baholash agentligiga ko‘ra, abituriyentlarga yaratilgan eng yaxshi qulayliklardan biri ro‘yxatdan o‘tishda beshtagacha ta’lim yo‘nalishini tanlash imkoniyati berilgani bo‘lib, abituriyentlar oldingidek faqatgina bitta ta’lim yo‘nalishiga hujjat topshirganida ularning teng yarmidan ko‘pi talabalikka tavsiya etilmagan bo‘lardi.
Bundan tashqari, 15,7 ming nafardan ortiq abituriyent davlat granti ustuvorligidan foydalangan holda davlat granti asosida talabalikka tavsiya etilgan.
2023-yilda davlat granti asosida talabalikka tavsiya etilgan 42 655 nafar abituriyentdan 32 818 nafari umumiy qabul parametrlari doirasida o‘qishga qabul qilingan.
Shundan 15 715 nafar (47,9 foiz) abituriyent davlat granti ustuvorligini tanlagan holda ikkinchi-beshinchi ta’lim yo‘nalishiga davlat granti asosida talabalikka tavsiya etilgan.
Bilim va malakalarni baholash agentligi xabarida ta’kidlanishicha, agar davlat granti ustuvorligi bo‘lmaganida mazkur abituriyentlarning aksariyati birinchi ta’lim yo‘nalishiga to‘lov-kontrakt asosida talabalikka tavsiya etilgan bo‘lar edi.
Izoh (0)