Ўзбекистонда абитуриентларнинг 56,9 фоизи бештагача таълим йўналишини танлаш имкониятидан фойдаланган ҳолда талабаликка тавсия этилган. Бу ҳақда Билим ва малакаларни баҳолаш агентлиги маълум қилди.
2023—2024-ўқув йили учун ОТМлар бакалавриат таълим йўналишларига кириш тест синови натижаларига кўра 193 421 нафар абитуриент талабаликка тавсия этилганди.
Шундан 180 минг нафарга яқини умумий қабул параметрлари доирасида ўқишга қабул қилинган бўлиб, уларнинг:
- 77 520 нафари (43,1 фоизи) — биринчи таълим йўналишига;
- 102 279 нафари (56,9 фоизи) — иккинчи-бешинчи таълим йўналишига талабаликка тавсия этилган.
Билим ва малакаларни баҳолаш агентлигига кўра, абитуриентларга яратилган энг яхши қулайликлардан бири рўйхатдан ўтишда бештагача таълим йўналишини танлаш имконияти берилгани бўлиб, абитуриентлар олдингидек фақатгина битта таълим йўналишига ҳужжат топширганида уларнинг тенг ярмидан кўпи талабаликка тавсия этилмаган бўларди.
Бундан ташқари, 15,7 минг нафардан ортиқ абитуриент давлат гранти устуворлигидан фойдаланган ҳолда давлат гранти асосида талабаликка тавсия этилган.
2023 йилда давлат гранти асосида талабаликка тавсия этилган 42 655 нафар абитуриентдан 32 818 нафари умумий қабул параметрлари доирасида ўқишга қабул қилинган.
Шундан 15 715 нафар (47,9 фоиз) абитуриент давлат гранти устуворлигини танлаган ҳолда иккинчи-бешинчи таълим йўналишига давлат гранти асосида талабаликка тавсия этилган.
Билим ва малакаларни баҳолаш агентлиги хабарида таъкидланишича, агар давлат гранти устуворлиги бўлмаганида мазкур абитуриентларнинг аксарияти биринчи таълим йўналишига тўлов-контракт асосида талабаликка тавсия этилган бўлар эди.
Изоҳ (0)