Ukraina prezidenti Vladimir Zelenskiy urush davridagi korrupsiyani davlatga xiyonat bilan tenglashtiruvchi qonun loyihasini tayyorlamoqchi. Bu haqda “Ukraina haqiqati” xabar berdi.
“Men o‘z oldimga vazifa qo‘yganman, korrupsiyani urush davridagi davlatga xiyonat bilan tenglashtirish bo‘yicha takliflarim Ukraina qonun chiqaruvchisiga taqdim etiladi. Bunday usullar jamiyatda doim ish bermasligini tushunaman, lekin urush paytida bu yordam beradi, deb o‘ylayman”, — dedi Ukraina rahbari jurnalist bilan intervyusida.
Zelenskiyning so‘zlariga ko‘ra, tegishli qonunchilik tashabbusi kelasi hafta Oliy Radaga yuboriladi.
“Keyin gap parlamentda qoladi”, — dedi u.
Ukraina Jinoyat kodeksida davlatga xiyonat uchun mol-mulki musodara qilingan yoki musodara qilinmagan holda o‘n ikki yildan o‘n besh yilgacha ozodlikdan mahrum qilish tarzidagi jazo nazarda tutilgan.
Jinoyat kodeksining “Noqonuniy boylik orttirish” bandi mol-mulki musodara qilingan holda uch yilgacha muayyan lavozimlarni egallash yoki muayyan faoliyat bilan shug‘ullanish huquqidan mahrum qiladi, shuningdek, besh yildan o‘n yilgacha muddatga ozodlikdan mahrum qilish jazosini nazarda tutadi.
Izoh (0)