Saylovchilarga jannatni va’da qilgan Zimbabvening amaldagi prezidenti ikkinchi muddatga saylandi

Zimbabvening amaldagi prezidenti Emmerson Mnangagva ikkinchi muddatga qayta saylandi. Bu haqda “TASS” xabar berdi.

Saylov komissiyasi raisi Prissilla Chigumba ZANU-PF partiyasi vakili Emmerson Mnangagvani Zimbabvening saylangan prezidenti deb e’lon qildi. Saylov byulletenlarini sanab chiqish natijalariga ko‘ra, u 52,6 foiz yoki 2,3 million ovoz to‘plagan, Muxolifatdagi “O‘zgarish uchun fuqarolik koalitsiyasi” partiyasi rahbari Nelson Chamisa 44 foiz yoki 1,9 million ovoz olgan. Saylovchilar ishtiroki 69 foizga yetgan.

Chamis saylov natijalaridan rozi emas va ovozlarni qayta hisoblashni talab qilgan. 2018-yilgi prezidentlik saylovlarida ham Mnangagva kichik hisobda Chamisani mag‘lub etgan. O‘shanda ham muxolifat hukmron partiyani ovoz berish natijalarini soxtalashtirishda ayblagan.

Zimbabve prezidenti Emmerson Mnangagva Zimbabve Afrika milliy ittifoqi — Vatanparvarlik fronti (ZANU PF) partiyasi rahbari. U 2017-yilning noyabrida sobiq davlat rahbari Robert Mugabe iste’foga chiqqanidan so‘ng prezident bo‘ldi.

Mnangagva saylovchilarga uning partiyasiga ovoz berishsa, jannatga tushishlarini va’da qilgandi. U saylovoldi kampaniyasida kim hukmron partiyaga ovoz bermasa, unga xiyonat qilishini ta’kidlagan. 

Zimbabveda hukumatni tanqid qilish taqiqlangan

Zimbabve yetakchisi Emmerson Mnangagva prezidentlik saylovlari oldidan fuqarolarning hukumatni tanqid qilishiga chek qo‘yuvchi qonunni imzolagandi.

Qonun zimbabveliklar o‘rtasida “vatanparvarlik tuyg‘usini rivojlantirishga qaratilgan” bo‘lib, bunga qarshi bo‘lganlar uchun o‘lim jazosigacha bo‘lgan hukm nazarda tutilgan.

Hukumatni tanqid qilish va uni ag‘darishga chaqirish, shuningdek, harbiy aralashuv, iqtisodiy sanksiyalar va savdo boykotlari uchun mamlakat ichida va tashqarisida mitinglar o‘tkazish taqiqlanadi.

Bunday harakatlar “mamlakat suvereniteti va milliy manfaatlariga qasddan zarar yetkazish” sifatida baholanadi.

Ushbu jinoyatlarni sodir etganlar fuqarolikdan mahrum etilishi, 20 yilgacha qamoqqa olinishi yoki o‘lim jazosiga hukm qilinishi mumkin, garchi oxirgi jazo 20 yil davomida Zimbabveda qo‘llanmagan.

• O‘z navbatida, Rossiya prezidenti Vladimir Putin Zimbabve prezidentining mazkur qarori fonida unga vertolyot sovg‘a qilgan.