Сайловчиларга жаннатни ваъда қилган Зимбабвенинг амалдаги президенти иккинчи муддатга сайланди

Зимбабвенинг амалдаги президенти Эммерсон Мнангагва иккинчи муддатга қайта сайланди. Бу ҳақда “ТАСС” хабар берди.

Сайлов комиссияси раиси Приссилла Чигумба ZANU PF партияси вакили Эммерсон Мнангагвани Зимбабвенинг сайланган президенти деб эълон қилди. Сайлов бюллетенларини санаб чиқиш натижаларига кўра, у 52,6 фоиз ёки 2,3 миллион овоз тўплаган, Мухолифатдаги “Ўзгариш учун фуқаролик коалицияси” партияси раҳбари Нелсон Чамиса 44 фоиз ёки 1,9 миллион овоз олган. Сайловчилар иштироки 69 фоизга етган.

Чамис сайлов натижаларидан рози эмас ва овозларни қайта ҳисоблашни талаб қилган. 2018 йилги президентлик сайловларида ҳам Мнангагва кичик ҳисобда Чамисани мағлуб этган. Ўшанда ҳам мухолифат ҳукмрон партияни овоз бериш натижаларини сохталаштиришда айблаган.

Зимбабве президенти Эммерсон Мнангагва Зимбабве Африка миллий иттифоқи — Ватанпарварлик фронти (ZANU PF) партияси раҳбари. У 2017 йилнинг ноябрида собиқ давлат раҳбари Роберт Мугабе истеъфога чиққанидан сўнг президент бўлди.

Мнангагва сайловчиларга унинг партиясига овоз беришса, жаннатга тушишларини ваъда қилганди. У сайловолди кампаниясида ким ҳукмрон партияга овоз бермаса, унга хиёнат қилишини таъкидлаган. 

Зимбабведа ҳукуматни танқид қилиш тақиқланган

Зимбабве етакчиси Эммерсон Мнангагва президентлик сайловлари олдидан фуқароларнинг ҳукуматни танқид қилишига чек қўювчи қонунни имзолаганди.

Қонун зимбабвеликлар ўртасида “ватанпарварлик туйғусини ривожлантиришга қаратилган” бўлиб, бунга қарши бўлганлар учун ўлим жазосигача бўлган ҳукм назарда тутилган.

Ҳукуматни танқид қилиш ва уни ағдаришга чақириш, шунингдек, ҳарбий аралашув, иқтисодий санкциялар ва савдо бойкотлари учун мамлакат ичида ва ташқарисида митинглар ўтказиш тақиқланади.

Бундай ҳаракатлар “мамлакат суверенитети ва миллий манфаатларига қасддан зарар етказиш” сифатида баҳоланади.

Ушбу жиноятларни содир этганлар фуқароликдан маҳрум этилиши, 20 йилгача қамоққа олиниши ёки ўлим жазосига ҳукм қилиниши мумкин, гарчи охирги жазо 20 йил давомида Зимбабведа қўлланмаган.

• Ўз навбатида, Россия президенти Владимир Путин Зимбабве президентининг мазкур қарори фонида унга вертолёт совға қилган.