Polshada Toshkent vaqti bilan 26-avgust, shanba tunida katta boks oqshomi bo‘lib o‘tdi.
Musobaqaning asosiy jangida super og‘ir vazn toifasida WBA, WBO va IBF kamarlari sohibi Oleksandr Usik va Daniel Dyubua o‘zaro to‘qnash keldi. 9-raundda Oleksandr Usik raqibini texnik nokautga uchratdi va g‘alaba qozondi.
Qayd etib o‘tish joiz, 5-raundda Dyubua Usik tomon qaltisroq zarba bergani bois, ukrainalik bokschi ringga yiqildi. Og‘riqlardan qutulib, o‘ziga kelishi uchun Oleksandrga bir necha daqiqa kerak bo‘ldi.
Danielga qarshi jang ukrainalik bokschi uchun 2023-yildagi ilk jangi bo‘ldi. Usik so‘nggi bor 2022-yil avgust oyida Entoni Joshuaga qarshi revansh jangida ringga ko‘tarilgandi.
Eslatib o‘tamiz, ushbu boks oqshomida o‘zbekistonlik bokschi Lazizbek Mullajonov qozog‘istonlik raqibiga qarshi ringga ko‘tarildi va 1-raunddayoq nokaut evaziga g‘alaba qozondi.
Izoh (0)