Qashqadaryodagi Dehqonobod davlat o‘rmon xo‘jaligi hududida 17 tup archaga shikast yetkazildi. Bu haqda Ekologiya, atrof-muhitni muhofaza qilish va iqlim o‘zgarishi vazirligi xabar qildi.
Holat viloyat Ekologiya boshqarmasi Dehqonobod tuman inspeksiyasi xodimlari tomonidan olib borilgan reyd davomida aniqlangan. Dehqonobod davlat o‘rmon xo‘jaligi “Kon” o‘rmon bo‘limining “Suvlisoy” massivi hududida tabiiy holda o‘sgan 6 tup Zarafshon archasi tag qismidan, 11 tup archaning esa yon shoxlari kesib tashlangan.
Holat yuzasidan o‘rmon qo‘riqchisi R.J.ga nisbatan Ma’muriy javobgarlik to‘g‘risidagi kodeksning 79-moddasi, 3-qismi bilan maʼmuriy bayonnoma rasmiylashtirilib, 3,3 million so‘m jarimaga tortilgan.
Tabiatga yetkazilgan 18 million 84 ming so‘m zararni undirish maqsadida hujjatlar tegishli tartibda rasmiylashtirilib, Dehqonobod Davlat o‘rmon xo‘jaligiga o‘tkazilgan.
Avvalroq Qashqadaryodagi bolalar shifoxonasi hududida 17 tup daraxt kesilgani aniqlangandi. Ayni paytda holat huquqni muhofaza qilish idoralari tomonidan o‘rganilmoqda.
Izoh (0)