Бугунги кунда бюрократия тадбиркорликни ривожлантиришга тўсқинлик қилувчи асосий омиллардан бири экани ҳеч кимга сир эмас. Шу муносабат билан Ўзбекистонда давлат томонидан бюрократияни қисқартириш бўйича кўрилаётган чора-тадбирлар бизнес юритиш ва, умуман, миллий иқтисодиётни янада ривожлантириш учун янги имкониятлар очиб бермоқда.
Тадбиркорларга яратилаётган енгилликлар одамларда ўз бизнесини очиш иштиёқини оширади, хусусий секторда ишчилар сони кўпайишига хизмат қилади, бу орқали эса одамларнинг турмуш даражаси ошади. Фаровон турмуш эса ўз навбатида давлатнинг барқарор ривжоланишининг асосий омили ҳисобланади.
Ўзбекистонда тадбиркорлик фаолиятининг тўсиқларсиз амалга оширишни таъминлаш, бизнес юритиш учун қулай шарт-шароитлар яратиш ва аҳолининг барча қатламларига тенг имкониятлар яратиб бериш мақсадида тадбиркорлик субъектларининг ҳуқуқлари ва қонуний манфаатларини ҳимоя қилиш тизими янада такомиллаштирилди.
Жумладан:
— Ижро ҳокимияти тизими ислоҳ қилиниб, бюрократия камайтирилди. Давлатнинг бизнесни тартибга солишга қаратилган 500 та функцияси бекор қилинди;
— Ҳозирги кунга қадар 132 та лицензия ва рухсат беришга оид ҳужжатлар бекор қилинди, 33 таси бўйича хабардор қилиш тартиби киритилди, лицензия ва рухсатнома бериш тартиб-таомиллари соддалаштирилди;
— Илгари янги тадбиркорлар учун “кириш қийин бўлган” 119 та фаолият бўйича лицензия ва рухсатномалар бекор қилинди ёки хабардор қилиш шаклига ўтказилди.
Биргина, республика ҳудудида юкларни автомобилда ташиш каби фаолият бўйича лицензияларни бекор қилиш ҳисобига юк ташиш ҳажми 1,5 бараварга ошди.
— “business.gov.уз” ягона интерактив портали негизида “Тадбиркор виртуал офиси” ахборот тизими ишга туширилиб, рақамли технологиялар орқали тадбиркорар мурожаатларини қабул қилиш ва кўтарилган масалаларни тезкор ҳал қилиш тизими яратилди;
— бизнесни Интернет орқали масофавий ҳамда Давлат хизматлари марказида 30 дақиқада рўйхатдан ўтказиш имконияти яратилди;
— давлат хизматларини кўрсатишда талаб этиладиган ҳужжатлар 221 тадан 95 тага қисқарди, муддатлари эса 2 бараварга камайди;
— бугунги кунда Давлат хизматлари марказлари орқали 280 турдаги хизматлар кўрсатилмоқда, 150 тадан ортиғи эса фақат электрон шаклда кўрсатилмоқда.
Натижада, сўнгги 5 йил ичида республикада рўйхатдан ўтган табдиркорлик субъектлари сони қарийб 2 баробарга кўпайиб, 600 мингтага етди.
Изоҳ (0)