Vazirlar Mahkamasining “Yo‘l harakati xavfsizligini taʼminlash sohasiga zamonaviy axborot texnologiyalarini keng joriy etish bo‘yicha qo‘shimcha chora-tadbirlar to‘g‘risida”gi qaroriga yo‘l harakati qatnashchilariga qo‘shimcha qulayliklar yaratish va yo‘l harakatini avtomatlashtirilgan tartibga solish tizimini takomillashtirishga qaratilgan o‘zgartirishlar kiritish haqida qaror qabul qilindi.
Endilikda sug‘urta polisining muddati o‘tgan, belgilangan muddatda texnik ko‘rikdan o‘tmagan transport vositalariga “yashil” yo‘lakdan harakatlanishga ruxsat beriladi. Muqaddam bunday transport vositalari “qizil” yo‘lakdan harakatlanishgan.
Maʼlumot uchun, bundan oldin YPX statsionar postlarida transport vositalarining to‘siqsiz harakatlanishini taʼminlash bo‘yicha “yashil” va “qizil” yo‘lak tizimi bosqichma-bosqich joriy etila boshlangan edi.
Hujjat qonun hujjatlari maʼlumotlari milliy bazasida eʼlon qilingan va 2023-yil 15-avgustdan kuchga kirgan.
Eslatib o‘tamiz, 2022-yil 7-iyuldan boshlab Toshkent viloyati hududida joylashgan “Chinor” yo‘l-patrul xizmatining stasionar postida ushbu yangicha tizimni sinovdan o‘tkazish boshlangandi. U yerda “yashil” va “qizil” yo‘lak tamoyili asosida avtotransport vositalarining harakatlanishi tartibga solinmoqda.
Izoh (0)