Ukraina Mudofaa vazirligi Donetskdagi muhim qishloq ozod etilganini e’lon qildi

Ukraina mudofaa vaziri o‘rinbosari Anna Malyar Ukraina harbiylari Donetsk viloyatidagi Urojaynoye qishlog‘ini ozod etgani haqida e’lon qildi.

“Urojaynoye ozod qilindi. Himoyachilarimiz chegaralarga mahkam o‘rnashdi. Hujum amaliyotlari davom etmoqda”, — deb yozgan Malyar Telegramm’da boshqa tafsilotlarni keltirmasdan.

Avvalroq Rossiya Mudofaa vazirligi bilan bog‘langan “Ribar” Telegram kanali “Rossiya qo‘shinlari Urojaynoyedan ​​olib chiqib ketilgandan so‘ng, qishloq kulrang zonaga o‘tdi” deb yozgandi. Telekanal maʼlumotlariga ko‘ra, Ukraina Qurolli kuchlari qishloqning shimolida “ishonchli nazorat”ni saqlab turibdi, janubda esa “ular okop qazib, o‘rnashishga urinmoqda, biroq ularga artilleriya va samolyotlar zarba bermoqda”.

Rossiyaning “Vostok” batalyoni Telegram kanalida 15-avgust kuni ertalab Urojaynoye boy berilgani haqida xabar berildi.

14-avgust kuni Malyar Ukraina harbiylari Urojaynoye qishlog‘ida “muayyan muvaffaqiyatlarga erishganini” aytgandi.

Donetsk viloyatining Urojaynoye qishlog‘ida, Mokriye Yali daryosi bo‘yida Rossiya Qurolli kuchlarining mustahkamlangan hududi bor edi. Ukraina harbiylari 8-avgust kuni Urojaynoyega hujum boshladi. The New York Times yozganidek, qishloqning Ukraina harbiylari tomonidan ozod etilishi rus qo‘shinlarini janubga, Staromlinovka yo‘nalishi bo‘yicha ikkinchi mudofaa chizig‘iga chekinishga majbur qilishi mumkin.

Agar Ukraina armiyasi Urojaynoyeni yorib o‘ta olsa, ular rus qo‘shinlari tomonidan bosib olingan Azov dengizidagi ikki yirik port shaharlar — Berdyansk va Mariupoldan 50 milya (80 kilometr) uzoqlikka kelib joylashadi.