Украина Мудофаа вазирлиги Донецкдаги муҳим қишлоқ озод этилганини эълон қилди

Украина мудофаа вазири ўринбосари Анна Маляр Украина ҳарбийлари Донецк вилоятидаги Урожайное қишлоғини озод этгани ҳақида эълон қилди.

“Урожайное озод қилинди. Ҳимоячиларимиз чегараларга маҳкам ўрнашди. Ҳужум амалиётлари давом этмоқда”, — деб ёзган Маляр Telegramм’да бошқа тафсилотларни келтирмасдан.

Аввалроқ Россия Мудофаа вазирлиги билан боғланган “Рибар” Telegram канали “Россия қўшинлари Урожайноедан ​​олиб чиқиб кетилгандан сўнг, қишлоқ кулранг зонага ўтди” деб ёзганди. Телеканал маълумотларига кўра, Украина Қуролли кучлари қишлоқнинг шимолида “ишончли назорат”ни сақлаб турибди, жанубда эса “улар окоп қазиб, ўрнашишга уринмоқда, бироқ уларга артиллерия ва самолётлар зарба бермоқда”.

Россиянинг “Восток” батальони Telegram каналида 15 август куни эрталаб Урожайное бой берилгани ҳақида хабар берилди.

14 август куни Маляр Украина ҳарбийлари Урожайное қишлоғида “муайян муваффақиятларга эришганини” айтганди.

Донецк вилоятининг Урожайное қишлоғида, Мокрие Яли дарёси бўйида Россия Қуролли кучларининг мустаҳкамланган ҳудуди бор эди. Украина ҳарбийлари 8 август куни Урожайноега ҳужум бошлади. The New York Times ёзганидек, қишлоқнинг Украина ҳарбийлари томонидан озод этилиши рус қўшинларини жанубга, Старомлиновка йўналиши бўйича иккинчи мудофаа чизиғига чекинишга мажбур қилиши мумкин.

Агар Украина армияси Урожайноени ёриб ўта олса, улар рус қўшинлари томонидан босиб олинган Азов денгизидаги икки йирик порт шаҳарлар — Бердянск ва Мариуполдан 50 миля (80 километр) узоқликка келиб жойлашади.