Toshkent shahar IIBB tomonidan shaharda tig‘iz vaqtlarda yuk mashinalarining harakatlanishini cheklash masalasi o‘rganilmoqda. Idora o‘zining Telegram-kanalida shu mavzuda so‘rovnoma o‘tkazyapti.
Unga ko‘ra, yuk avtomobillarining harakati ertalab soat 07:00 dan 10:00 gacha va kechki soat 17:00 dan 20:00 gacha bo‘lgan vaqt oralig‘ida cheklanishi mumkin.
Ayni paytda so‘rovda 4,4 mingdan ortiq kishi qatnashgan, ularning 89 foizi ushbu taqiqqa rozi.
2022-yilning oktabrida Xalq deputatlari Toshkent shahar kengashining 71-sessiyasida poytaxtning Kichik halqa avtomobil yo‘li ichida joylashgan barcha ko‘chalarda transport vositalarining harakat tezligini soatiga 60 kilometrgacha cheklash to‘g‘risida qaror qabul qilingandi. Doimiy komissiya va IIBB YHXB tomonidan Kichik halqa avtomobil yo‘li ichida joylashgan barcha ko‘chalarda transport vositalarining harakat tezligini soatiga 60 kilometrgacha cheklash maqsadga muvofiq deb topilgan.
Prognozlashtirish va makroiqtisodiy tadqiqotlar instituti ekspertlariga ko‘ra, shaharlarda eng yuqori tezlikni soatiga 10 kilometrga kamaytirish o‘lim darajasini yiliga 0,8 kishiga (har 100 000 kishiga) kamaytirishda yordam beradi. O‘zbekiston uchun bu 614 nafar insonning hayotini saqlab qolish deganidir.
Izoh (0)