Вазирлар Маҳкамасининг тегишли қарори билан тарихий маданий мерос объектлари жойлашган кўчаларда оғирлиги 5 тоннадан ортиқ бўлган юк машиналари ҳаракатланиши тақиқланади.
Ҳужжатга асосан, чиқинди тўплаш ҳамда иккиламчи хом ашёни қабул қилиш шохобчалари моддий-маданий мерос кўчмас мулк объектларининг қўриқланадиган чегараларидан ташқарида жойлаштирилади.
Шунингдек, моддий-маданий мерос кўчмас мулк объектлари ҳудудида қаттиқ маиший чиқиндиларни вақтинчалик тўплаш ва сақлаш жойлари бинолар фасадининг транспорт ҳамда пиёда транзит коммуникацияси кўринмайдиган зонасида ташкил этилади.
Бундан олдин Тошкент шаҳар ИИББ томонидан шаҳарда тиғиз вақтларда юк машиналарининг ҳаракатланишини чеклаш масаласи ўрганилаётгани тўғрисида хабар берилганди. Унга кўра, юк автомобилларининг ҳаракати эрталаб соат 07:00 дан 10:00 гача ва кечки соат 17:00 дан 20:00 гача бўлган вақт оралиғида чекланиши мумкин.
2021 йил декабрда Маданият вазирлиги ҳузуридаги Маданият ва санъатни ривожлантириш жамғармаси амалдаги молиялаштириш тартиби ва штатлар сони сақланган ҳолда Вазирлар Маҳкамаси ҳузуридаги Маданият ва санъатни ривожлантириш жамғармаси этиб қайта ташкил қилинганди.
Мазкур жамғарма 2017 йилнинг октябрида президент Шавкат Мирзиёевнинг тегишли қарори билан ташкил этилганди. 2021 йилда унинг мамлакат маданий меросини асраб-авайлаш бўйича бир қанча лойиҳалари борлиги айтилганди, жумладан, княз Николай Романовнинг собиқ қароргоҳини реконструкция қилиш, замонавий санъат маркази, собиқ “Интурист” маданият ва ахборот маркази биносини реконструкция қилиш лойиҳаси ва Тошкентдаги Республика болалар кутубхонаси, пойтахтдаги модернизм объектларини регенерация қилиш, шунингдек, Ўзбекистон давлат санъат музейининг янги биносини қуриш.
Изоҳ (0)