Ўзбекистон мудофаа вазири генерал-лейтенант Баҳодир Қурбонов бошчилигидаги ҳарбий делегация Қозоғистоннинг “Оймаша” полигонида ўтказилаётган Ўзбекистон ва Қозоғистон Қуролли кучлари махсус бўлинмалари ҳамкорлигидаги махсус-тактик ўқувларини бевосита кузатди. Бу ҳақда вазирлик матбуот хизмати хабар берди.
Қайд этилишича, ҳар икки давлатнинг мудофаа вазирлари ҳарбий полигон бўйлаб ҳарбий хизматчиларнинг 10 дан ортиқ ўқув нуқталарида ўтказаётган махсус-тактик ўқувларини кузатган, бевосита унда иштирок этди ва жанговар қуроллардан ўқ узган.
Ўқув режасига мувофиқ, ҳарбий хизматчилар тезкор куч ва воситалар билан ҳамкорликда шартли душманни яксон этиш бўйича ҳаракатларни амалга оширган. Ўқувлар давомида махсус бўлинмалар учувчисиз учиш қурилмаларидан фойдаланган ҳолда разведка-қидирув ҳаракатларини олиб борган.
.jpg)
Шу билан бирга, Ўзбекистон ҳарбий делегацияси Ақтау шаҳрида жойлашган ҳарбий қисмдаги шароитлар билан яқиндан танишган, денгиз флотидаги қўшинларнинг кемани қўлга олиш ва ҳужум қилиш бўйича тактик машғулотларини кузатган.
“Машғулотлар якунида мудофаа вазирлари ҳарбий хизматчиларнинг жанговар қобилиятларини юқори баҳолаб, ҳар икки давлатнинг ҳарбий хизматчиларига жанговар ҳамдўстликни мустаҳкамлашдаги хизматлари учун кўкрак нишонларини топширди”, — дейилади хабарда.
Май ойида Тошкент ҳарбий округининг “Ангрен” дала ўқув майдонида Ўзбекистон ва Қозоғистон Қуролли кучлари махсус бўлинмалари ҳамкорлигидаги “Қалқон-2023” махсус-тактик ўқувларининг асосий фазаси бўлиб ўтганди.
Изоҳ (0)