Yevropa Ittifoqi davlatlari 1-sentabrdan boshlab sanksiyalangan tovarlarning Rossiya orqali uchinchi davlatlarga, jumladan, O‘zbekistonga tranzitini butunlay taqiqlaydi. Bu haqda VPostMedia nashri xabar berdi.
Rossiya logistika va tashqi savdo kompaniyalari yevropalik kontragentlardan shunday xabarnoma olgani aytilmoqda.
OAV Rossiya Qozog‘iston, O‘zbekiston va Qirg‘izistonga tranzit niqobi ostida Boltiqbo‘yi davlatlaridan sanksiyaga kiritilgan tovarlar, jumladan, asbob-uskunalar va boshqa mexanik qurilmalarni sotib olganini ta’kidladi.
“G‘arb bundan juda yaxshi xabardor edi. Kavkaz va Markaziy Osiyo mamlakatlariga tranzit orqali jo‘natilgan tovarlarning qariyb yarmi Rossiyada qolgan, Yevropa tiklanish va taraqqiyot banki buning uchun hatto ‘Yevrosiyo karuseli’ atamasini ham o‘ylab topgan”, — deb tushuntirdi OAV.
Tranzit ustidan nazoratni kuchaytirish Yevropa Ittifoqining Rossiyaga qarshi 11-sanksiyalar paketida nazarda tutilgan.
Nashrning qayd etishicha, hozirda Yevropa Ittifoqidan Rossiyaga bunday mahsulotlarni import qilishning eng oson yo‘li Turkiya orqalidir.
Biroq mamlakat bahordan beri sanksiyalangan mahsulotlarning tranzitiga ruxsat bermadi, bu esa ularni uchinchi davlatlar – Qozog‘iston, O‘zbekiston, Qirg‘iziston yoki Armaniston orqali yoki Turkiyada bojxona rasmiylashtiruvi va qayta qadoqlash orqali olib o‘tish zarurligini bildiradi.
Bu ikkala usul ham ancha qimmat va yetkazib berish narxining 10-40 foizini tashkil qiladi.
“Yevropa va AQSHdan Armaniston, Gruziya, Qozog‘iston, Qirg‘iziston va O‘zbekistonga umumiy eksport hajmi 2022-yilda 9,7 mlrd dollarga yoki 66 foizga oshib, 24,3 mlrd dollarni tashkil etdi. Bu besh davlatdan Rossiyaga eksport hajmi esa 4,8 mlrd dollarga o‘sgan. Bu 2021-yilga nisbatan qariyb 50 foizga oshib, 15 mlrd dollarni tashkil qilgan”, — xabar bergandi The Washington Post nashri.
Izoh (0)