Buxoro shahrida 11-avgust kuni Shavkat Mirziyoyev raisligida oziq-ovqat mahsulotlarini ko‘paytirish orqali narx-navo barqarorligini ta’minlash hamda aholi va iqtisodiyot tarmoqlarini energiya resurslari bilan kafolatli ta’minlash masalalari yuzasidan videoselektor yig‘ilishi o‘tkazildi.
Yig‘ilishda suv resurslari yildan yilga kamayib borayotgani oqibatida oziq-ovqat tanqisligi ko‘plab davlatlarda kun tartibidagi eng asosiy masalalardan biriga aylanayotgani ta’kidlandi.
Bunday sharoitda O‘zbekistonda paxta va g‘alla maydonlarini qisqartirish hisobiga aholiga dehqonchilik qilishi uchun 200 ming gektar yer maydonlari ajratilgani, lekin hokimlar ulardan foydalanishni to‘g‘ri tashkil qila olmayotgani ko‘rsatib o‘tildi.
Qayd etilishicha, bugungi kunda 94 ta tuman va shahar o‘zining aholisini kartoshkaga bo‘lgan talabini ta’minlay olmaydi, 62 tasi piyoz, 60 tasi sabzi, 84 tasi go‘sht, 139 tasi parranda go‘shti va tuxumni boshqa hududlardan olib keladi.
Davlat rahbari har bir masalaga alohida to‘xtalib, muammolarning yechimini ko‘rsatib o‘tdi.
Paxta va g‘alla maydonlarini qisqartirib, bu yili kuzda va kelgusi yil bahorida yana 70 ming gektar ekin yerlarini aholiga tarqatish reja qilingan. Ma’lum qilinishicha, suv ta’minoti va unumdorligi yaxshi bo‘lmagani uchun jami yerlarning 13 ming gektari yoki 8 foizi qarovsiz turibdi.
Buxoro, Qashqadaryo va Namanganda atigi 15 foiz yer ehtiyojmand oilalarga berilgan. Shu munosabat bilan dastlabki bosqichda 10 yil muddatga ajratilgan 73 ming gektar maydonning ijara muddatlari 30 yilga uzaytirib berilishi belgilandi.
Bo‘sh turgan 100 ming gektar yaylovlar chorvasi bor aholiga kamida 10 gektardan 10 yil muddatga ijaraga olishiga ruxsat beriladi.
“Ijtimoiy himoya reyestri”ga kiritilgan ehtiyojmand aholiga yerlarni berishda ular yer uchun barcha to‘lovlardan ozod qilinadi.
Izoh (0)