Rossiya Qozog‘iston va O‘zbekistonning gaz sohasida hamkorligiga boshqa davlatlar ham qo‘shilishi mumkin. Bu haqda “RIA Novosti”ga bergan intervyusida Rossiya TIV iqtisodiy hamkorlik departamenti direktori Dmitriy Birichevskiy ma’lum qildi.
“Gaz sohasida uch tomonlama hamkorlikni kengaytirish imkoniyatini istisno qilmaymiz. Bunga boshqa davlatlar ham qiziqish bildirayotganini bilamiz. U barcha ishtirokchilar pozitsiyasini hisobga oluvchi, o‘zaro manfaatli va konstruktiv bo‘lishi kerakligini anglagan holda bunday hamkorlikka ochiqmiz”, — degan u.
Rossiya prezidenti Vladimir Putin 2022-yilning noyabrida gazni Qozog‘iston va O‘zbekiston hududi orqali tashish bo‘yicha harakatlarni muvofiqlashtirish uchun O‘zbekiston ishtirokida “uch tomonlama gaz ittifoqi” tuzishni taklif qilgandi.
O‘sha yilning dekabrida O‘zbekiston energetika vaziri Jo‘rabek Mirzamahmudov O‘zbekiston qo‘shni davlatlardan gaz va elektr energiyasini qandaydir alyans yoki ittifoq orqali emas, balki tijorat shartnomalari asosida import qilish niyatida ekanini aytgan.
2023-yil 18-yanvar kuni “Gazprom” Qozog‘iston bilan, 24-yanvar kuni O‘zbekiston bilan gaz sohasida hamkorlikni rivojlantirish bo‘yicha yo‘l xaritasi imzolandi. 16-iyunda esa Rossiya gazini O‘zbekistonga yetkazib berish bo‘yicha shartnoma va respublika gaz uzatish tizimini Rossiya gazini qabul qilishga tayyorlash bo‘yicha yo‘l xaritasi imzolandi.
Unga ko‘ra, UzGastrade AJ va “Gazprom eksport” MCHJ o‘rtasida 2 yil muddatga gaz oldi-sotdisi bo‘yicha shartnoma tuzildi. Shartnoma doirasida 2023-yilning 1-oktabridan kuniga 9 million kubometr tabiiy gazni import qilish boshlanishi mo‘ljallanmoqda. Yillik hajm esa qariyb 2 milliard 800 million metr3 ni tashkil etadi.
Izoh (0)