Prezident tomonidan “Narkologik kasalliklar profilaktikasi va ularni davolash to‘g‘risida”gi O‘zbekiston Respublikasi qonuniga o‘zgartishlar va qo‘shimcha kiritish haqida”gi qonun imzolandi, deb xabar beradi Norma.
Hujjatga muvofiq, ichki ishlar organlariga narkologik kasalliklarga chalingan shaxslarni majburiy tartibda davolashga yuborish to‘g‘risidagi hujjatlarni rasmiylashtirish vakolati berilmoqda.
Hujjatlar narkologiya muassasalari, oila aʼzolari iltimosiga ko‘ra, shuningdek, ichki ishlar organlarining o‘z tashabbusi bilan (oila aʼzolarini xabardor qilgan holda) ichki ishlar organlari tomonidan tayyorlanib, rasmiylashtiriladi.
Ichki ishlar organlari shaxsni ekspertizadan o‘tkazish uchun uning yashash joyi bo‘yicha narkologiya dispanseriga yetkazadi. Tibbiy ekspertiza xulosasiga ko‘ra, ichki ishlar organlari to‘plangan hujjatlarni shaxsni yashash joyida yoki narkologiya dispanseri joylashgan hududdagi sudga kiritadi.
Eslatib o‘tamiz, mazkur qonunga o‘zgartirish kiritish masalasi Oliy Majlis Senati qirq ikkinchi yalpi majlisida ko‘rib chiqilgandi. May oyida esa Milliy gvardiyaga mayda bezorilik va jamoat joylarida alkogol ichish kabi huquqbuzarliklarga bayonnoma tuzish vakolati berilgan edi.
Izoh (0)