Президент томонидан “Наркологик касалликлар профилактикаси ва уларни даволаш тўғрисида”ги Ўзбекистон Республикаси қонунига ўзгартишлар ва қўшимча киритиш ҳақида”ги қонун имзоланди, деб хабар беради Norma.
Ҳужжатга мувофиқ, ички ишлар органларига наркологик касалликларга чалинган шахсларни мажбурий тартибда даволашга юбориш тўғрисидаги ҳужжатларни расмийлаштириш ваколати берилмоқда.
Ҳужжатлар наркология муассасалари, оила аъзолари илтимосига кўра, шунингдек, ички ишлар органларининг ўз ташаббуси билан (оила аъзоларини хабардор қилган ҳолда) ички ишлар органлари томонидан тайёрланиб, расмийлаштирилади.
Ички ишлар органлари шахсни экспертизадан ўтказиш учун унинг яшаш жойи бўйича наркология диспансерига етказади. Тиббий экспертиза хулосасига кўра, ички ишлар органлари тўпланган ҳужжатларни шахсни яшаш жойида ёки наркология диспансери жойлашган ҳудуддаги судга киритади.
Эслатиб ўтамиз, мазкур қонунга ўзгартириш киритиш масаласи Олий Мажлис Сенати қирқ иккинчи ялпи мажлисида кўриб чиқилганди. Май ойида эса Миллий гвардияга майда безорилик ва жамоат жойларида алкогол ичиш каби ҳуқуқбузарликларга баённома тузиш ваколати берилган эди.
Изоҳ (0)