O‘zbekistonda nodavlat maktabgacha va maktab ta’limi tashkiloti faoliyatini yo‘lga qo‘yish uchun imtiyozli kredit berish yo‘lga qo‘yilishi mumkin. Bu haqda “O‘zbekiston—2030” strategiyasini 2023-yilda sifatli va o‘z vaqtida amalga oshirish chora-tadbirlari to‘g‘risidagi prezident qarori loyihasida so‘z boradi.
Qaror loyihasida belgilanishicha, 2023-yil 1-sentabrdan boshlab nodavlat maktabgacha va maktab ta’limi tashkilotlari faoliyatini yo‘lga qo‘yish uchun foiz stavkalarini subsidiyalash hisobiga 7 foizlik stavkada 10 yil muddatga kredit berish amaliyotini joriy qilish rejalashtirilmoqda.
Shuningdek, quyidagilarni amalga oshirish belgilangan:
- yuridik shaxslarning maktabgacha va maktab ta’limi tashkilotini qurishga sarf etiladigan xarajatlarini barcha soliqlardan to‘liq ozod etish;
- “Ijtimoiy himoya yagona reyestri” axborot tizimiga kiritilgan oilalarning farzandlari uchun maktabgacha ta’lim tashkilotlarida ta’lim va tarbiya olish xarajatlarini davlat tomonidan qoplab berish tartibini joriy etish;
- umumiy o‘rta ta’lim tizimida “Yiliga 500 ming o‘quvchi o‘rni” dasturini amalga oshirish, uning doirasida 2023/2024-o‘quv yilida 500 ming yangi o‘quvchi o‘rni tashkil etish.
Prezident Administratsiyasi tomonidan ishlab chiqilgan hujjat loyihasining muhokama jarayoni 15-avgustgacha davom etadi.
Avvalroq “O‘zbekiston—2030” strategiyasi loyihasida O‘zbekistonda maktabgacha va umumiy o‘rta ta’lim muassasalari pedagog xodimlarining ish haqini ikki barobar oshirish rejalashtirilayotgani to‘g‘risida xabar berilgandi.
Izoh (0)