Ўзбекистонда нодавлат мактабгача ва мактаб таълими ташкилоти фаолиятини йўлга қўйиш учун имтиёзли кредит бериш йўлга қўйилиши мумкин. Бу ҳақда “Ўзбекистон—2030” стратегиясини 2023 йилда сифатли ва ўз вақтида амалга ошириш чора-тадбирлари тўғрисидаги президент қарори лойиҳасида сўз боради.
Қарор лойиҳасида белгиланишича, 2023 йил 1 сентябрдан бошлаб нодавлат мактабгача ва мактаб таълими ташкилотлари фаолиятини йўлга қўйиш учун фоиз ставкаларини субсидиялаш ҳисобига 7 фоизлик ставкада 10 йил муддатга кредит бериш амалиётини жорий қилиш режалаштирилмоқда.
Шунингдек, қуйидагиларни амалга ошириш белгиланган:
- юридик шахсларнинг мактабгача ва мактаб таълими ташкилотини қуришга сарф этиладиган харажатларини барча солиқлардан тўлиқ озод этиш;
- “Ижтимоий ҳимоя ягона реестри” ахборот тизимига киритилган оилаларнинг фарзандлари учун мактабгача таълим ташкилотларида таълим ва тарбия олиш харажатларини давлат томонидан қоплаб бериш тартибини жорий этиш;
- умумий ўрта таълим тизимида “Йилига 500 минг ўқувчи ўрни” дастурини амалга ошириш, унинг доирасида 2023/2024-ўқув йилида 500 минг янги ўқувчи ўрни ташкил этиш.
Президент Администрацияси томонидан ишлаб чиқилган ҳужжат лойиҳасининг муҳокама жараёни 15 августгача давом этади.
Аввалроқ “Ўзбекистон—2030” стратегияси лойиҳасида Ўзбекистонда мактабгача ва умумий ўрта таълим муассасалари педагог ходимларининг иш ҳақини икки баробар ошириш режалаштирилаётгани тўғрисида хабар берилганди.
Изоҳ (0)