Kenja farzand bo‘lgan: Farg‘onada o‘z joniga qasd qilgan 16 yoshli qiz ishi bo‘yicha yangi ma’lumotlar berildi

Farg‘ona viloyati Buvayda tumanida 16 yoshli qiz o‘zini osib qo‘ygani haqida xabar berilgan edi. Mazkur holat bo‘yicha yangi tafsilotlar ochiqlandi.

Ma’lum qilinishicha, marhuma oiladagi uch farzandning eng kenjasi bo‘lgan. U yashagan “Jiydali” MFY raisi bo‘lgan voqea haqida aytib, oila namunali oilalardan ekanini ta’kidladi. 

“Ularni shunchaki maqtab, vaziyatdan chiqib ketish uchun aytmayapman. Haqiqatan ham bu oila namunali, birovga ziyoni tegmagan, o‘zini o‘zi band qilgan. Onasi bilan gaplashganimizda 10-15 kundan beri ruhiyatida o‘zgarish bo‘lib qolgani, odamlarni ko‘rgisi kelmayotganini aytgandi. “Uzoqlarga tashlab kelinglar”, deyayotgan ekan.

O‘sha kuni ham onasi bilan birga bo‘lgan ekan. Molga suv berish uchun molxonaga kirib ketgan. Onasini qo‘shnisi chaqirib qolgan va ko‘chaga chiqib ketgan. Qaytib kelib chaqirsa, ovoz bermabdi. Orqasidan kirsa, osilgan holatda ko‘ribdi”, — deydi mahalla raisi. 

Qayd etilishicha, marhuma molxonada ro‘moliga osilgan holda vafot etgan. Marhumaning yaqin qarindoshlari so‘nggi vaqtlarda uning ruhiyati buzilgani, o‘z joniga qasd qilishida hech kimning aybi yo‘qligini izohlab, tushuntirish bergan.

Ayni paytda mazkur holat yuzasidan tergovga qadar tekshiruv harakatlari olib borilmoqda.