O‘zbekistonda shu yilning dastlabki 6 oyida qayd etilgan nikohlar soni o‘tgan yilning mos davriga qaraganda 10 000 taga kamaydi. Bu haqda Statistika agentligi maʼlumot berdi.
Respublikada yanvar-iyun oylarida jami 98 700 ta nikoh tuzildi. Shundan shahar joylarida 49 400 ta (50 foiz), qishloq joylarida 49 300 ta (50 foiz) oila qurilgan.
Qayd etilgan nikohlarda ayollarning o‘rtacha yoshi 23,3 yoshni, erkaklarning o‘rtacha yoshi esa 27,9 yoshni tashkil etgan. Nikohlarning eng katta ulushi 25 yoshgacha bo‘lgan ayollarga (74,6 foizi) to‘g‘ri kelgan.
Nikohlanganlarning 70,2 foizini 20–30 yoshli fuqarolar, 14,7 foizini 20 yoshgacha bo‘lganlar, 10,9 foizini 31–40 yoshlilar, 4,2 foizi 41 va undan katta yoshdagilar tashkil etgan.
Yanvar–iyun davomida eng ko‘p nikohlar Samarqand (10 336 ta) va Farg‘ona (10 193 ta) viloyatlarida qayd etilgan. Eng kam nikohlar Sirdaryo (2 394 ta) va Navoiy (2 768 ta) viloyatlarida ro‘yxatga olingan.
Nikohlarning o‘sish surʼati eng yuqori darajasi Xorazm, Farg‘ona, Navoiy, Qashqadaryo viloyatlari hamda Toshkent shahrida kuzatilgan. Eng past o‘sish darajasi Toshkent, Jizzax, Andijon, Sirdaryo viloyatlari va Qoraqalpog‘iston Respublikasida qayd qilingan.
Izoh (0)