“Дарё” репортажи: Наманганда Чортоқ деҳқон бозорида рўй берган ёнғин асоратлари бартараф этилмоқда (фото ва видео)

Наманганда Чортоқ деҳқон бозорида рўй берган ёнғин асоратлари бартараф этилмоқда. Бу ҳақда “Дарё” мухбири Азизбек Абдувалиев хабар бермоқда.

Вилоят Фавқулодда вазиятлар бошқармаси мутасаддиларининг билдиришича, 5 август куни тонгга яқин содир бўлган ёнғинни ўчириш учун 9 та экипаж сафарбар қилинган. Шунингдек, ҳамкор ташкилотларнинг сув ташиш машиналари ҳам жараёнга жалб этилган.

Мазкур саъй-ҳаракатлар натижасида бозорнинг 40 00 квадрат метр ҳудуди оловдан сақлаб қолинган. Бироқ шунда ҳам 6 та дўкон ва 35 та савдо растаси ёниб кетган.

Жумладан, тадбиркор Акрам Маткаримовнинг айтишича, шу ерда жойлашган фотостудиясига ёнғин туфайли жиддий зарар етган ва 40 минг долларлик аппаратураси яроқсиз ҳолатга келган.

Чортоқ деҳқон бозори маъмурияти ходими Комилжон Мамажоновнинг билдиришича, ҳозирда бозор ҳудудини ёнғин асоратларидан тозалаш ишлари олиб борилмоқда. Ҳокимлик томонидан ташкил этилган штаб ушбу жараённи мувофиқлаштириш ва ёнғин оқибатида зарар кўрган тадбиркорларнинг мурожаатларини кўриб чиқиш билан шуғулланмоқда.

Тозалаш ишлари якунланганидан сўнг янги савдо расталари ва дўконларни тиклаш, мавжудларини эса таъмирлашга киришилади.

Қайд этиш жоизки, Чортоқ бозорида содир бўлган ҳодисадан сўнг вилоятдаги барча бозорларда ёнғин хавфсизлиги билан боғлиқ тадбирлар бошланган.