Rossiyada muxolifatchi siyosatchi Aleksey Navalniyga nisbatan “ekstremizm” ishi bo‘yicha sud qarori e’lon qilinadi. Navalniy “stalincha” hukmni kutmoqda. Bu haqda Bild xabar berdi.
Navalniyning hamrohlari hukm chiqarilishidan oldin muxolifatchining appelyatsiya arizasini o‘qib eshittirdi.
“Ozodlikdan mahrum qilish muddati uzoq — ‘stalincha’ bo‘ladi. Uni hisoblash formulasi oddiy: prokuror so‘ragan narsa, minus 10-15 foiz. Ular 20 yil so‘raydi, biroq 18 yoki shunga o‘xshash yil beriladi. Bu unchalik muhim emas, buning ketidan terrorizm ishi turibdi. Bu bo‘yicha yana 10 yil berilishi mumkin”, — dedi siyosatchi.
Uning so‘zlariga ko‘ra, mazkur sud jarayonining asosiy maqsadi Kreml siyosatiga rozi bo‘lmaganlarning barchasini qo‘rqitishdir.
“Raqam eshitilganda, iltimos, ‘Stalin davridagi kabi’ nola bilan menga bardamlik bildirmang. Yaxshisi, men va boshqa siyosiy mahbuslar bilan bir daqiqa o‘ylab, birdamlik ko‘rsating. O‘ylab ko‘ring, nega bunday katta muddat berilyapti? Buning asosiy maqsadi — qo‘rqitish. Meni emas, sizlarni. Bu satrlarni o‘qiyotgan shaxsan sizni qo‘rqitish”, — deb yozgan Navalniy.
Hozirda 47 yoshli Aleksey Navalniy koloniyada jazo muddatini o‘tamoqda: u firibgarlikda ayblanib, to‘qqiz yillik qamoq jazosiga hukm qilingan.
Endilikda Kremlning asosiy tanqidchisi “ekstremistik tashkilot”ni yaratish va moliyalashda ayblanmoqda.
Navalniy o‘zining so‘nggi nutqida yig‘ilishlar o‘tkazilayotgan koloniyada gapirar ekan, Rossiyaning Ukrainaga bostirib kirishini qoralab, buni “XXI asrning eng ahmoq va ma’nosiz urushi” deb atagan.
Izoh (0)