Россияда мухолифатчи сиёсатчи Алексей Навальнийга нисбатан “экстремизм” иши бўйича суд қарори эълон қилинади. Навальний “сталинча” ҳукмни кутмоқда. Бу ҳақда Bild хабар берди.
Навальнийнинг ҳамроҳлари ҳукм чиқарилишидан олдин мухолифатчининг аппеляция аризасини ўқиб эшиттирди.
“Озодликдан маҳрум қилиш муддати узоқ — ‘сталинча’ бўлади. Уни ҳисоблаш формуласи оддий: прокурор сўраган нарса, минус 10-15 фоиз. Улар 20 йил сўрайди, бироқ 18 ёки шунга ўхшаш йил берилади. Бу унчалик муҳим эмас, бунинг кетидан терроризм иши турибди. Бу бўйича яна 10 йил берилиши мумкин”, — деди сиёсатчи.
Унинг сўзларига кўра, мазкур суд жараёнининг асосий мақсади Кремль сиёсатига рози бўлмаганларнинг барчасини қўрқитишдир.
“Рақам эшитилганда, илтимос, ‘Сталин давридаги каби’ нола билан менга бардамлик билдирманг. Яхшиси, мен ва бошқа сиёсий маҳбуслар билан бир дақиқа ўйлаб, бирдамлик кўрсатинг. Ўйлаб кўринг, нега бундай катта муддат бериляпти? Бунинг асосий мақсади — қўрқитиш. Мени эмас, сизларни. Бу сатрларни ўқиётган шахсан сизни қўрқитиш”, — деб ёзган Навальний.
Ҳозирда 47 ёшли Алексей Навальний колонияда жазо муддатини ўтамоқда: у фирибгарликда айбланиб, тўққиз йиллик қамоқ жазосига ҳукм қилинган.
Эндиликда Кремлнинг асосий танқидчиси “экстремистик ташкилот”ни яратиш ва молиялашда айбланмоқда.
Навальний ўзининг сўнгги нутқида йиғилишлар ўтказилаётган колонияда гапирар экан, Россиянинг Украинага бостириб киришини қоралаб, буни “XXI асрнинг энг аҳмоқ ва маъносиз уруши” деб атаган.
Изоҳ (0)