Shavkat Mirziyoyev Toshkent viloyatidagi yangi sanoat, xizmat ko‘rsatish va ijtimoiy soha majmualarini ishga tushirdi, deb xabar bermoqda Prezident matbuot xizmati.
Unga ko‘ra, Shavkat Mirziyoyev Toshkent viloyatiga tashrifi chog‘ida Chirchiq kimyo-industrial texnoparkida bo‘ldi. Tatariston bilan hamkorlikdagi mazkur texnopark o‘tgan yil 23-mart kuni ochilgan edi. Bugungi kunda 10 million dollarlik 5 ta korxona ishga tushirilgan. Joriy yil yakuniga qadar qiymati 18 million dollar bo‘lgan yana 8 ta loyiha amalga oshiriladi.
Xususan, “Rodium Polimer” masʼuliyati cheklangan jamiyati tomonidan ko‘piklantirilgan polipropilen mahsulotlar ishlab chiqarish yo‘lga qo‘yildi. Koreyalik ishbilarmonlar bilan birgalikda amalga oshirilgan bu korxonada yiliga 2 ming tonna mahsulot ishlab chiqarilib, 2 million dollarlik eksport qilinadi.
Shu yerda Toshkent viloyatidagi yangi sanoat, xizmat ko‘rsatish va ijtimoiy soha majmualarini ishga tushirish marosimi bo‘ldi. Bular – Ohangaron tumanidagi “Tashkent Konch sement”, Quyi Chirchiq tumanidagi “Tashkent Cotton Textile”, Yuqori Chirchiq tumanidagi “Asia Tashkent Textile”, “Salyubris Vita”, Angren shahridagi “Angren kaolin”, “Central Asia Chemicals”, Nurafshon shahridagi “Agro New Drip”, Chirchiq shahridagi “Sharq Tubs”, Parkent tumanidagi “Samsarak Fayz” va “Shabnam Elegant”lardir. Bu korxonalarda sement, ip-kalava, to‘qimachilik, farmatsevtika, boyitilgan kaolin, kimyo mahsulotlari, tomchilatib sug‘orish shlanglari, rangli metallar ishlab chiqariladi. Mazkur korxonalarda 3 mingdan ziyod yangi ish o‘rni yaratiladi.
Davlat rahbari ramziy tugmani bosib, yangi korxonalarni ishga tushirdi.
Izoh (0)