Шавкат Мирзиёев Тошкент вилоятидаги янги саноат, хизмат кўрсатиш ва ижтимоий соҳа мажмуаларини ишга туширди, деб хабар бермоқда Президент матбуот хизмати.
Унга кўра, Шавкат Мирзиёев Тошкент вилоятига ташрифи чоғида Чирчиқ кимё-индустриал технопаркида бўлди. Татаристон билан ҳамкорликдаги мазкур технопарк ўтган йил 23 март куни очилган эди. Бугунги кунда 10 миллион долларлик 5 та корхона ишга туширилган. Жорий йил якунига қадар қиймати 18 миллион доллар бўлган яна 8 та лойиҳа амалга оширилади.
Хусусан, “Родиум Полимер” масъулияти чекланган жамияти томонидан кўпиклантирилган полипропилен маҳсулотлар ишлаб чиқариш йўлга қўйилди. Кореялик ишбилармонлар билан биргаликда амалга оширилган бу корхонада йилига 2 минг тонна маҳсулот ишлаб чиқарилиб, 2 миллион долларлик экспорт қилинади.
Шу ерда Тошкент вилоятидаги янги саноат, хизмат кўрсатиш ва ижтимоий соҳа мажмуаларини ишга тушириш маросими бўлди. Булар – Оҳангарон туманидаги “Tashkent Конч цемент”, Қуйи Чирчиқ туманидаги “Tashkent Cоtton Textile”, Юқори Чирчиқ туманидаги “Аsia Tashkent Textile”, “Салюбрис Вита”, Ангрен шаҳридаги “Ангрен каолин”, “Central Asiа Chemicals”, Нурафшон шаҳридаги “Аgrо New Drip”, Чирчиқ шаҳридаги “Sharq Tubs”, Паркент туманидаги “Самсарак Файз” ва “Шабнам Элегант”лардир. Бу корхоналарда цемент, ип-калава, тўқимачилик, фармацевтика, бойитилган каолин, кимё маҳсулотлари, томчилатиб суғориш шланглари, рангли металлар ишлаб чиқарилади. Мазкур корхоналарда 3 мингдан зиёд янги иш ўрни яратилади.
Давлат раҳбари рамзий тугмани босиб, янги корхоналарни ишга туширди.
Изоҳ (0)