O‘zbekistonda 12 million nafar bola milliy emlash kalendari asosida 13 turdagi boshqariluvchi yuqumli kasallikka qarshi emlangani maʼlum bo‘ldi. Bu haqda AOKAda bo‘lib o‘tgan matbuot anjumanida Sanitariya-epidemiologik osoyishtalik va jamoat salomatligi qo‘mitasi raisi o‘rinbosari Nurmat Otabekov maʼlum qildi.
“So‘nggi yillarda Sanitariya-epidemiologik osoyishtalik va jamoat salomatligi qo‘mitasiga alohida eʼtibor qaratildi. Natijada bir qator ijobiy ishlar amalga oshirildi. Respublika bo‘yicha 12 million nafar bolada 13 turdagi boshqariluvchi yuqumli kasalliklarga qarshi emlash tadbirlari milliy emlash kalendari asosida tashkil etildi va epidemik barqarorlik saqlab qolindi.
Amalga oshirilgan profilaktik va epidemiyaga qarshi chora-tadbirlar natijasida joriy yilning olti oyi davomida ayrim yuqumli kasalliklarning o‘tgan 2022-yilning shu davriga nisbatan pasayishi kuzatildi. Jumladan salmonellez infeksiyasi 18,1 foizga, bakterial ichburug‘ 46,2 foizga, o‘tkir ichak kasalliklari 10,4 foiz, virusli gepatit V 26,9 foizga, virusli gepatit C 27,7 foiz, ayrim gelmintoz kasalliklar, masalan askaridoz 26,8 foiz, trixotsefalyoz 85 foiz, teniarinxoz 23 foizga pasaygan”, — deydi Nurmat Otabekov.
Qayd etilishicha, respublika bo‘yicha amalga oshirilayotgan profilaktik va epidemiyaga qarshi samarali tadbirlar natijasida o‘lat, vabo, sariq isitma, virusli gemorragik isitmalar, parranda grippi kabi karantin va o‘ta havfli yuqumli kasalliklarning respublika hududiga chetdan kirib kelishi va aholi o‘rtasida tarqalib ketishiga yo‘l qo‘yilmagan.
“Yevropa va jahon savdo tashkilotlari va xalqaro talablardan kelib chiqib, taʼlim, qurilish, oziq-ovqat va boshqa sohalar bo‘yicha 40 ta sanitariya qoida va meʼyorlari yangi tahrirda qabul qilindi va xalqaro andozalarga moslashtirildi”, — deydi masʼul.
Izoh (0)