Ўзбекистонда 12 миллион нафар бола миллий эмлаш календари асосида 13 турдаги бошқарилувчи юқумли касалликка қарши эмлангани маълум бўлди. Бу ҳақда АОКАда бўлиб ўтган матбуот анжуманида Санитария-эпидемиологик осойишталик ва жамоат саломатлиги қўмитаси раиси ўринбосари Нурмат Отабеков маълум қилди.
“Сўнгги йилларда Санитария-эпидемиологик осойишталик ва жамоат саломатлиги қўмитасига алоҳида эътибор қаратилди. Натижада бир қатор ижобий ишлар амалга оширилди. Республика бўйича 12 миллион нафар болада 13 турдаги бошқарилувчи юқумли касалликларга қарши эмлаш тадбирлари миллий эмлаш календари асосида ташкил этилди ва эпидемик барқарорлик сақлаб қолинди.
Амалга оширилган профилактик ва эпидемияга қарши чора-тадбирлар натижасида жорий йилнинг олти ойи давомида айрим юқумли касалликларнинг ўтган 2022 йилнинг шу даврига нисбатан пасайиши кузатилди. Жумладан салмонеллез инфекцияси 18,1 фоизга, бактериал ичбуруғ 46,2 фоизга, ўткир ичак касалликлари 10,4 фоиз, вирусли гепатит V 26,9 фоизга, вирусли гепатит C 27,7 фоиз, айрим гелминтоз касалликлар, масалан аскаридоз 26,8 фоиз, трихоцефалёз 85 фоиз, тениаринхоз 23 фоизга пасайган”, — дейди Нурмат Отабеков.
Қайд этилишича, республика бўйича амалга оширилаётган профилактик ва эпидемияга қарши самарали тадбирлар натижасида ўлат, вабо, сариқ иситма, вирусли геморрагик иситмалар, парранда гриппи каби карантин ва ўта ҳавфли юқумли касалликларнинг республика ҳудудига четдан кириб келиши ва аҳоли ўртасида тарқалиб кетишига йўл қўйилмаган.
“Европа ва жаҳон савдо ташкилотлари ва халқаро талаблардан келиб чиқиб, таълим, қурилиш, озиқ-овқат ва бошқа соҳалар бўйича 40 та санитария қоида ва меъёрлари янги таҳрирда қабул қилинди ва халқаро андозаларга мослаштирилди”, — дейди масъул.
Изоҳ (0)