Superliga. “Navbahor” safarda g‘alaba qozonib, 1-o‘ringa qaytdi. “Bunyodkor” o‘z uyida “So‘g‘diyona”ga yutqazdi

Futbol bo‘yicha O‘zbekiston Superligasining 14-turidan o‘rin olgan ikkita uchrashuv 30-iyul, yakshanba kuni bo‘lib o‘tdi.

“Navbahor” safarda “Qizilqum”ga qarshi maydonga tushdi. O‘yin debyutida namanganliklar Jamshid Boltaboyevning goli evaziga oldinga o‘tib oldi. Oradan ko‘p o‘tmay “Qizilqum” vakillari muvozanatni tikladi — Islom Kenjaboyev penaltini aniq amalga oshirdi.

Tanaffus arafasida vodiy klubi ikkinchi golni urishi mumkin edi, biroq Jasur Yaxshiboyev penaltidan unumli foydalana olmadi. 60-daqiqada Yaxshiboyev o‘z xatosini to‘g‘rilagan holda, jamoasini yana oldinga olib chiqdi. Qolgan vaqtda hisob o‘zgarmadi.

“Bunyodkor” o‘z maydonida “So‘g‘diyona”ni qabul qildi. Uchrashuvning 12-daqiqasida Javohir Qahramonov mehmonlarni oldinga olib chiqqan bo‘lsa, bo‘lim so‘ngida Zenan Zaymovich hisobni ishonchli ko‘rinishga olib keldi. Ikkinchi bo‘limda darvozalar daxlsiz qoldi.

14-turdan keyin musobaqa jadvali quyidagi ko‘rinishni oldi:

Superliga

14-tur bahslari

30-iyul, yakshanba

“Qizilqum” – “Navbahor” 1:2

Gollar: 0:1 – 3 Boltaboyev, 1:1 – 14, penalti Kenjaboyev, 1:2 – 60 Yaxshiboyev.

“Bunyodkor” – “So‘g‘diyona” 0:2

Gollar: 0:1 – 12 Qahramonov, 0:2 – 44 Zaymovich.