Bugungi kunda butun dunyoda, jumladan, O‘zbekistonda ham “Yashil energetika”ga katta ahamiyat qaratilmoqda. Hukumat tomonidan biznes egalari va aholi uchun quyosh panellaridan foydalanish bo‘yicha bir qator imtiyozlar taqdim qilinyapti.
Shu bilan birga, quyosh elektr stansiyalarining ommaviyligi oshishi bilan ushbu qurilmalarning inson salomatligi va atrof-muhitga ta’siri haqida ko‘plab savollar tug‘iladi. Quyosh panellari inson salomatligi va atrof-muhit uchun xavfsizmi? Quyida ana shunday savollarga javob topishga urinib ko‘ramiz.
Quyosh panellari inson sog‘lig‘i uchun bezararmi?
Ko‘pchilikni qiziqtirgan savolga hoziroq javob berish mumkin: quyosh panellari sog‘liq uchun bezarar. Bunday qurilmalarning inson yoki hayvonlar salomatligi uchun xavf tug‘dirishi yoki ularning atrof-muhitga salbiy ta’sirini tasdiqlovchi tadqiqotlar mavjud emas.
Hozirgi vaqtda quyosh panellari ishlab chiqarish uchun kremniy (kremniy asosidagi yupqa plyonkali batareyalar), kadmiy tellurid, shuningdek, galliy asosidagi kontsentrator batareyalaridan foydalaniladi. Panellarni tayyorlash va utilizatsiya qilishda xavfsizlik qoidalariga amal qilinsa, bu holatda inson va atmosferaga zarar yetmaydi.
Yong‘in xavfi: quyosh panellari xavfsizmi?
Ko‘pchilikda binoning tomida quyosh panelini o‘rnatish yong‘in xavfini oshiradimi, degan savol tug‘ilishi mumkin. Olimlarning aniqlashicha, quyosh panellari chaqmoqni “o‘ziga tortadi” degan tushuncha noto‘g‘ri. Chaqmoq paytida quyosh modullari bilan jihozlangan bino panellar o‘rnatilmagan bino bilan bir xil darajada elektr zaryadiga duchor bo‘ladi. Yana o‘sha yuqoridagi gap: quyosh panellarini o‘rnatish jarayonida texnika xavfsizligiga rioya qilinsa, hech qanday muammo kuzatilmaydi.
Ekologiya va atrof-muhitga ta’siri
Quyosh panellari haqidagi eng keng tarqalgan xavotirlardan biri ularning tabiatga salbiy ta’siri haqidagi xavotirdir. Quyosh fermalari va ekologiya bir-biriga dushman emas. Aksincha, quyosh panellaridan foydalanish davomida atmosferada “uglerod izi” kamroq kuzatiladi. Quyosh paneli 1 kVt soat energiya ishlab chiqarishi jarayonida atigi 50 g karbonat angidrid hosil qiladi. Taqqoslash uchun, xuddi shunday miqdorda energiya olish uchun ko‘mirdan foydalanilganda, 1000 g karbonat angidrid ajralib chiqadi!
Muddati tugagan quyosh panellarini utilizatsiya qilish ham atrof-muhitga zarar yetkazmaydi. Bu jarayonda fotoelektrik modullarni demontaj qilish, saqlash va qayta ishlash bo‘yicha qat’iy talablarga amal qilinsa kifoya.
Yuqorida ko‘rib o‘tganimizdek, tobora ko‘payib borayotgan quyosh fermalari zararli bo‘lishi mumkinligi haqidagi xavotirlarga asos yo‘q.
Ishlab chiqarish jarayonida yuqori sifatli xomashyolardan foydalanilsa, shuningdek, o‘rnatish, foydalanish va utilizatsiya qilish vaqtida belgilangan talablarga rioya qilinadigan bo‘lsa, quyosh panellari yuqori darajadagi xavfsizlikni kafolatlaydi.
Izoh (0)